充滿愛的驚喜禮物 洪永城︰突然被安排出國留學

還有不足一個月便是聖誕節，不少人已開始購買聖誕禮物，送給摯愛親朋。收到禮物固然開心，感受送禮者的愛和心意更為窩心，未知以下一班藝人收過最特別、最驚喜的禮物又是甚麼呢？

洪永城（Tony）回想收過最好的禮物，就是十歲那年父母送他到新西蘭讀書，他說︰「嗰年阿媽突然同我講『你下個禮拜就要去新西蘭讀書』，當時有啲驚，因為自己讀書唔叻，不過嗰邊有親戚照顧，所以父母都好放心…我喺嗰邊讀咗八年中學，之後就返香港讀大學。」

問快將榮升爸爸的Tony，會否同樣讓自己的小朋友出國讀書？他表示︰「要負擔小朋友去外國讀書真係好難，我都仲有好幾年時間先去到呢步。到時再諗啦，可能嗰陣我唔捨得都未定。」他直言自己教導小朋友的態度比較惡，但太太梁諾妍（Inez）則較放鬆，兩人一凹一凸，互補不足。

黎諾懿 老婆送的「小春雞」

對黎諾懿來說，第一次當爸爸就是他收過最好的禮物，他憶述︰「嗰日老婆鬼鬼祟祟同我講『你就嚟做爸爸啦！』到依家我都仲好記得嗰個畫面，因為之後嘅人生就多咗個人仔，比起其他任何禮物都深刻。當時我就不斷諗，唔知呢個小朋友會唔會同自己一樣樣呢？」

諾懿甜笑表示，四歲多的囝囝黎峰睿（小春雞）依然十分黐身，每次食飯都喜歡坐在自己大髀上，就算太太李潔瑩阻止，諾懿都會勸她︰「畀佢坐啦，仲坐得幾多年吖。」他又笑言︰「個仔好蠱惑，成日話錫媽媽多啲，但實際上鍾意黐住我，因為我會陪佢玩，又縱容佢做『壞事』。」

湯洛雯 一位男生的溫暖牌頸巾

湯洛雯（靚湯）收過最難忘的禮物，是讀大學時一位男生親手織的溫暖牌頸巾，她表示︰「見佢嗰條頸巾有好多窿，都諗到佢應該織得好辛苦。收到呢一份禮物真係幾驚喜，因為我一向鍾意啲手工藝、DIY嘢，覺得呢一份禮物真係幾好。」

靚湯透露至今仍有好好收藏這條溫暖牌頸巾︰「我唔會隨便扔人哋嘅心意，有時都會拎出嚟睇下，但唔係回味…依家同對方仲有聯絡嘅，不過佢已經結咗婚㗎喇。」

王君馨 花14小時製忍者龜蛋糕

王君馨（Grace）收過最驚喜的禮物，原來是由老公Daniel所贈，「嗰時我同佢仲係異地戀，有次佢嚟香港，其中一個喼剩係裝住一隻巨型啤啤熊！佢話驚我孤零零，所以送隻熊公仔陪我，依家隻啤啤熊仲放喺我哋間房。」

不過Grace笑言兩年前親手焗製的忍者龜立體蛋糕，讓老公更為驚喜。Grace說︰「係佢嘅生日禮物，起初以為四、五個鐘就整好，點知最後足足用咗14個鐘。製作過程佢完全唔知，不過我有拍片…佢收到嗰刻好驚喜，仲話唔捨得食，呢件作品我都畀自己98分㗎！」

採訪︰Pauline

美術︰梁政敏