傳搬入豪宅揸名車 何依婷否認忽然富貴

17年港姐亞軍何依婷近年有不少演出機會，今年更憑《十月初五的月光》「祝君好」一角挑戰視后寶座，可見被受無綫力捧。近日有傳基層出身的她突然生活富貴，不但經常出入名店，更駕駛價值50萬元名車及搬入紅磡豪宅。何依婷昨日出席活動否認傳聞，解釋「名車」為二手車，亦沒有買樓。

何依婷昨日宣傳台慶劇《十月初五的月光》，被指忽然富貴的她澄清傳言︰「嗰架『名車』其實係二手車，不過真係好難令其他人明白…其實嗰日去完髮型屋整頭之後要做嘢，亦無喺名店買嘢。（搬入豪宅？）多謝大家關心，但我依家真係無錢買樓，嗰度都係租嘅。今次影響到家人同朋友，我好內疚無盡力去保護佢哋，希望大家關注番我嘅工作。」

至於劇集播出以來，何依婷的表現屢受批評，她表示未有刻意看留言，但明白有人不喜歡是正常的；另有網民批評她的聲綫太高音和吵耳，何依婷回應指︰「自己睇番都覺得係，但之後調校過把聲會沉咗，希望大家畀機會我。」

胡鴻鈞不介意與張智霖比較

另外，同場的胡鴻鈞（Hubert）和羅天宇在劇中大玩HeHe情，觀眾反應不俗，兩子都表示十分開心。天宇又自認比較內向和慢熱，Hubert則說︰「我不嬲都會將內斂嘅人變得『火熱』，所以拍攝期間成日撩佢傾偈…天宇其實幾幽默、幾鍾意搞事同搗亂，成班人一齊嘅時候又會搞氣氛。」談到兩人劇中有不少親密的身體接觸，天宇尷尬指︰「之前未試過同男仔咁親密，仲要由背脊去到對腳都咁貼（有無『硬晒』？）無『硬晒』亦都無心理陰影。」

對於網民將飾演「初哥哥」的Hubert與原版張智霖（Chilam）作比較，Hubert直言沒有壓力︰「Chilam真係經典，我反而希望呢套劇可以吸引年輕一輩重溫番當年嘅版本。」

採訪、攝影︰Pauline

美術︰梁政敏