【聲明】港生活網站並無進行電話推廣活動

《造星IV》梁祖堯Foul大熱咖喱捱批 許廷鏗幫口︰真人騷有唔同考量

發佈時間: 2021/12/03

ViuTV《全民造星IV》近日再掀話題,前晚一集中,美女醫生咖喱(黃雅慧)竟被所屬的B組導師梁祖堯(阿祖)foul出局,無緣晉身30強。A組導師許廷鏗(Alfred)昨午現身活動時力撑阿祖︰「呢個係最好決定,拍攝完結唔代表佢哋(組員)仕途完結。」

前晚的《造星IV》中,許廷鏗的A5組與阿祖的B3組對撼,B3組員包括熱門咖喱及余香凝胞妹余潔滢。B3演唱指定歌曲《狂人日記》時,四位成員多次甩嘴兼追不上拍子,最終吳雨霏、卓韻芝等評判以5:0的票數宣布A5組勝出,B3組慘成輸家。由於阿祖一早將咖喱列入「死亡名單」,因此這位美女醫生無得留低,她亦淚流滿面,表現不捨。阿祖在節目中解釋︰「我見咖喱進步比其他人少,唔係話我個人口味唔鍾意佢,係我想改變佢一啲嘢時,佢改變唔到。」不過,網民一面倒狂插阿祖錯得離譜;有人更指阿祖只教戲無教唱歌,才令B3組落入敗局。

咖喱發文感激阿祖

昨晚咖喱在IG發表肺腑之言,表示透過參賽成功增強自信,又為阿祖抱不平︰「多謝阿祖無私嘅教導,雖然我未必係你最愛,但係我相信你愛B Team每一位,你擺入去嘅effort(努力)我哋都見到。」另外,Alfred及林欣彤昨日到沙田出席服裝品牌活動,Alfred為阿祖講好話:「我一向都好鍾意佢(咖喱),但無辦法,當下決定係電光火石間,亦係最好嘅決定。」他又指真人騷節目有很多鏡頭無播出,會有不同考量︰「大家唔捨得咖喱係開心事,即係佢觀眾緣好。(阿祖被鬧?)我唔敢睇留言,同埋唔會改變結果。(多人讚你?)我都有搵鄧小巧幫手教唱歌,遲啲仲搵我best friend做評判。」他透露部分被淘汰的組員有新任務︰「今日(昨日)我好似爸爸咁,帶幾個組員出席活動,如果佢哋時間OK,遲啲都會幫我一齊做音樂會;至於阿祖都邀請被淘汰嘅組員演舞台劇,拍攝完結唔代表仕途完結。」

採訪、攝影︰Steven

美術︰梁政敏

《造星IV》梁祖堯Foul大熱咖喱捱批 許廷鏗幫口︰真人騷有唔同考量

許廷鏗爆阿祖找部分被淘汰組員參演舞台劇,未知咖喱是否有份。

《造星IV》梁祖堯Foul大熱咖喱捱批 許廷鏗幫口︰真人騷有唔同考量

咖喱(右)贏盡網民歡心,卻無得留低。(網上截圖)