【聲明】港生活網站並無進行電話推廣活動

無意第3度封視帝 鄭嘉穎︰仲爭獎就好老套

發佈時間: 2021/12/06

鄭嘉穎在劇集《星空下的仁醫》中飾演「鬍鬚醫生」大受歡迎,昨日他以「仁醫」身份出席慈善活動,與28年前同屆新人馬浚偉再聚頭。對於無綫最近重播《怒火街頭》,是否為他第三度封視帝鋪路?嘉穎直言不想再爭獎,但認同獎項相當具影響力,望鼓勵更多從未得獎的演員。

鄭嘉穎、馬浚偉(馬仔)、鄭丹瑞和應屆港姐三甲宋宛穎、梁凱晴及邵初等昨日到又一城出席「高錕慈善基金」義賣活動,呼籲大眾關注長者腦退化的情況。嘉穎笑指周日是家庭日,因此太太陳凱琳帶同大仔Rafael到場支持,他說︰「星期日梗係family day,今次難得過海,帶囝囝周圍玩下、開心下。」

提到無綫現時深夜重播嘉穎封視帝之作《怒火街頭》,加上樂易玲受訪時揚言視帝、視后人選跟是否合約藝人無關,似乎為他第三度封帝鋪路?嘉穎表示︰「我仲爭(獎)就好老套㗎喇!我首先要多謝觀眾支持呢部劇集同『鬍鬚醫生』呢個角色,但我意願係想頒畀未拎過嘅演員。視帝呢個獎的確改變咗我一生,我同樣希望其他人改變一生,譚俊彥同張振朗兩個都好努力,值得鼓勵佢哋。」

馬浚偉無睇《十月初五的月光》

嘉穎與馬仔是同屆新人,馬仔受訪時笑言︰「28年前同嘉穎係同期新人,我哋仲係同門師兄弟,都係跟戴思聰學唱歌。最搞笑當年商台叱咤頒獎禮,男新人得我同佢兩個,銅獎仲要從缺。」對於新版的《十月初五的月光》正熱播,馬仔當年飾演的「司徒禮信」改由羅天宇擔正,馬仔直言︰「抱歉呢排真係忙到不得了,所以我無睇。我同羅天宇合作過,但我覺得千祈唔好比較,無嘢需要比較,佢哋盡咗力去演,觀眾會收到。」

採訪︰楊安莉

美術︰梁政敏

無意第3度封視帝 鄭嘉穎︰仲爭獎就好老套

(左起)馬仔、嘉穎、宋宛穎、梁凱晴、邵初及鄭丹瑞昨日齊齊出席慈善義賣活動。