ViuTV大型偶像育成節目《全民造星IV》在昨晚(6日)播出的一集,許廷鏗A1組的Marf(邱彥筒)、CK(黃斯琪)、Win Win(楊安妮)和So Ching(蘇芷晴),自選項目為「狼人殺」主題的《天黑請閉眼》,當許廷鏗拿着Marf的資料,示意考慮將她列入「死亡名單」時,編審寶姐立即勸阻他,但在該集完結都未有公布Marf何去何從;網民直指Marf是王牌、是「世一」、冠軍級人馬。梁祖堯的B2組的Gao(沈貞巧)、Mic(周卓盈)和Alice(許寶恆),她們的自選項目是以百老匯歌舞形式去演繹《Please don’t jump!》,可惜評判並不欣賞,當中吳雨霏更批評她們唱歌不合格。其後,許廷鏗在IG限時動態出帖留言表示:「我諗如果我揀Marf入死亡名單的話,我的娛樂圈生涯都會入死亡名單。」
同場加映:拳王│許家傑好人難做演奸角成專業 「慶幸自己11年前冇入錯行」
一直以來,foul人的準則受到觀眾質疑,很多人替早已被淘汰的阿妹(黃敏蕎)、Yanis(吳欣諺)、Yanny(劉綺婷)感不值,因而有點遷怒兩位導師(許廷鏗、梁祖堯);有觀眾同樣感到疑惑,既沒進步亦無觀眾緣的方方(方芷欣)至今仍然在位,認為一切都是因為阿祖的偏袒。有網民遂在ViuTV Facebook留言,指阿祖不請外援去調教組員的唱功問題。
全民造星IV丨醫生咖喱被批冇進步要出局 開直播:我冇嬲阿祖【下一頁】
昨晚,阿祖在社交平台逐一反駁7大指控,包括「做乜唔搵人幫手!你自己唱歌都唔掂」、「點解應該留低嗰啲你就foul晒」、「做乜鬼成日做戲呀?選女團定係選劇團」、「你根本唔識做導師」、「你知唔知咩叫觀眾緣呀X街」、「靚就係觀眾緣啦你識唔識」和「你唔使解釋啦,我見到嘅唔係咁囉」;雖然網民唱反調,但已被淘汰的組員亦有給阿祖留言和派心心,「靚女醫生」咖喱(黃雅慧)說:「你嘅effort(努力),Team B都見到。」而「人妻護士」Ash(鍾卓穎)則指:「總有人會明白你的好。」
全民造星IV丨人妻護士Ash被淘汰全城震怒 導師梁祖堯大罵:foul錯人【下一頁】
梁祖堯回應,全文盡錄:
1.做乜唔搵人幫手!你自己唱歌都唔掂!
「節目無剪出嚟唔代表我冇搵嘅。我約咗唱歌老師畀每個人上private class,佢哋本來已經忙到唔收新學生㗎啦,但係都仆心仆命捱義氣幫手,仲成日免費幫佢哋補鐘!借呢個機會好衷心多謝Guddy、Sharon同Lianna老師!亦都多謝咁多位編曲嘅朋友,其中TMa係我非常欣賞嘅編曲人,來自天堂的魔鬼係佢做㗎喇,基本上我都唔認識佢,只係一直好欣賞佢,搭上搭搵佢,佢一口應承,多謝你呀!」
2.點解應該留低嗰啲你就foul晒?
「邊個出局有好多因素,女團名額有限,總會有人喺唔同嘅階段要離開。我只可以講,傾邊一個出局都係我哋兩位導師加花姐同阿Wing四個人一齊嘅決定。每次battle完之後,基本上最少都要傾成個半鐘先有定論,因為要考慮嘅嘢實在太多,始終最後女團組成後嘅經營同埋管理唔係我哋兩位導師,經理人嘅意見都好重要。」
3.做乜鬼成日做戲呀?選女團定係選劇團?
「今季就係要加強戲劇上面嘅訓練,呢個係節目一開始嘅方針,我相信亦都係製作組搵我嘅原因。老實講今季嘅參賽者喺節目一開始時,並唔係個個都能歌善舞,睇到好多人將佢哋同舊年第三季作比較,第三季嘅主題係藝人再出道,表演經驗上有差距係可以理解嘅。但係佢哋呢班女仔喺節目開始拍攝之後好努力咁去上堂學唱歌去練舞,每round都明顯地在進步,畀少少時間同耐性佢哋學習和成長吧。」「每次group battle嘅item大概就只有兩星期或更短時間去準備,比賽總要揚長避短,喺某啲組別加入戲劇元素只係希望作品出來可以豐富啲。有啲成功,有啲冇咁成功,但係每一個嘗試嘅背後都得到好多。」
「喺戲劇作品裏面好容易會見到參賽者性格嘅唔同面向,有啲參賽者真係有演戲或搞笑天份,如果成功展現嘅話,觀眾就會對佢哋有比較深嘅記憶點。次次都淨係排一啲勁歌熱舞,又點見到佢哋呢一面呢?呢啲面向會為佢哋帶嚟另外一啲機會,而呢個就係我嘅責任。香港嘅女團只能唱歌跳舞?不如換個角度諗,如果透過呢個比賽能夠發掘佢哋更加多嘅可能性,唔係更有趣咩?」
4.你根本唔識做導師!
「我真係唔識㗎,而家都學緊,成世流流長每一日都係學習。」
5.你知唔知咩叫觀眾緣呀X街!
「我知啊,觀眾緣咪就係觀眾睇嘅時候嘅緣份囉,問題係我哋睇嘅時間同你哋睇嘅時間有好大嘅差別,你而家睇緊嗰個節目唔係live,係三個月前錄嘅,所以你而家睇到嘅觀眾緣係經過製作組嘅挑選和剪接,我哋睇到嘅觀眾緣係嚟自長時間嘅排練同埋相處,仲有比賽時嘅臨場表現。如果我預測到三個月後會發生嘅事,我買咗六合彩啦!」
6.靚就係觀眾緣啦你識唔識㗎?
「靚絕對係觀眾緣嘅條件之一,但唔係唯一。造星唔只選美咁簡單嘅。」
7.你唔使解釋啦,我見到嘅唔係咁囉!
「其實呢,你而家見到嘅嘢只係製作組想你見到嘅嘢。我哋9月2號第一日排練,到今日12月6號,14個星期,我當每星期排六日(老實講,其實唔止),一日排八個鐘(老實講,其實又係唔止),14x6x8=672小時,製作隊伍就真係會拍晒,而家出街嘅係25集,每集45分鐘,我都唔分A、B組豪畀你,到目前為止,出街都係19個鐘頭嘅嘢,672-19 = 仲有653鐘頭嘅嘢你係睇唔到。剪接點樣令到大家對件事有一個固有嘅觀感,作為香港人經過咗呢幾年,唔係唔知係咪呀?我當然唔係話剪接有問題,佢哋勞心勞力,喺海量嘅素材裏面挑選一啲有故事性、有追看性嘅片段出嚟,真係已經做到最好,但係你睇唔到嘅嘢唔代表冇發生嘅。」「當有一個人要出局,背後一定有好多原因。剪晒嗰啲原因出嚟,對個參賽者一定冇好處,就節目效果嚟講,咁當然要剪佢好嘅嘢出嚟,咁當你見到佢咁好又被foul,一定會戥佢好唔抵;造星除咗係一個選秀比賽,仲係一個綜藝節目,就係要有呢啲戲劇嘅效果,咁個節目先會好睇㗎嘛。」
撰文:黃曉妍
U Lifestyle App自家節目登錄《U TV》專區!
↓↓試玩、試食、試用影片任您睇↓↓
【立即體驗】