演技吸負評變進步動力 劉穎鏇感謝網民︰鬧得有道理

16年港姐亞軍劉穎鏇（Tiffany）轉眼投身電視圈五年多，由《學是學非》的是非精，到今年《大步走》初嘗女主角滋味，這位年僅24歲的小妮子學懂以正面心態笑對負評，直認「愈鬧愈愛」，「睇到網民feedback（反應）先知自己問題所在，多啲人鬧我先有進步。」果然高EQ。

劉穎鏇來港參選港姐，改變這位在洛杉磯長大的女孩一生，「由細到大都無諗過去選美，當時媽咪以為我玩玩下，諗住選完就返美國。」不過，幾經艱辛下終於贏得亞軍，Tiffany決心留港發展至今。「我以前嚟香港都係度假兩星期就走，未試過長住，所以掙扎咗好耐，父母叫我試下，結果留到依家。」當時她在洛杉磯就讀大學一年級，還有三年才畢業，留港後亦決定重返校園。「媽咪希望我大學畢業，所以我報咗外國嘅遙距大學課程，日頭上堂夜晚拍劇，有時喺錄影廠都要做功課，呢幾年終於修夠學分畢業。」

靠父親建立中文基礎

回想去年拍劇集《超能使者》期間，Tiffany經歷最艱苦時刻。「《超》劇有唔少動作場面，又要兼顧讀書，但好彩搞得掂，大學畢業證書都寄咗去洛杉磯屋企。」她不諱言因疫情及隔離檢疫，暫時無意返美︰「我畢咗業一年都未影畢業相，所以好期待有朝一日返洛杉磯影相。」身為力爭上位的花旦之一，Tiffany今年劇接劇，先後拍攝《青春不要臉》及《隱形戰隊》，中文僅屬「有限公司」的她默默耕耘，以拼音學習看中文劇本。「我以前嘅中文能力只係BB班，呢幾年識多咗中文字。」她特別感激父親為她「打好底」，「我喺美國生活嗰陣，身邊所有表兄弟姊妹都唔鍾意用中文，只會用英文溝通，爸爸英文唔叻，所以喺屋企會強迫我講廣東話，當年決定留港發展，佢最開心。」

入行前Tiffany未受過正統演戲訓練，卻在今年初播出的《大步走》擔正，她更為劇集犧牲長髮，以短髮造型迎合少女角色。不過，她的努力未獲注視，反遭網民狠批演技幼嫩及唸對白生硬，這位小妮子對批評處之泰然，「始終我個角色多戲份，拿捏得未算好好，自己睇番演出都唔滿意，網民鬧得有道理，多啲人鬧先知道自己點進步。」她又感慨道︰「爸爸都會幫我睇網民評語再繙繹畀我知，始終親人、朋友一定錫住我，網民鬧就會真實啲，如果唔知道自己問題，就永遠唔會進步。」Tiffany認為有人鬧總好過無人理，「最緊要觀眾對我演出有feedback，睇完批評先有動力。」

曾減肥失衡心情低落

身高1.76米的Tiffany，初來港選美時被外界狠批「大件頭」，重新適應港人的審美眼光，令她體會甚深。「我喺美國時朋友話我太瘦，但返嚟選港姐好多人話我大份，媽咪當時都叫我減，但人生從未試過減肥，又鍾意食西式甜品，留港咁多年，先明白係啲肌肉唔夠結實，當年同依家都相差十幾磅。」她認同瘦身有助上鏡，亦已習慣現時體重，但減肥過程絕不易捱︰「今年初拍《青春不要臉》嗰陣想再瘦啲，就試過斷食，但無配合運動，加上身體無糖份無精神，當時好唔開心。」Tiffany其後明白運動配合飲食才是王道，現時無論多忙碌，也抽時間跑步及行山。

服裝︰breadnbutterofficial

撰文︰Steven

美術︰梁政敏

攝影︰林良明