與劉心悠拍劇不敢加親密戲 馬浚偉︰唔可以有利益衝突

馬浚偉（馬仔）前晚以香港電台創作總監身份出席港台電視31舉行的「2022節目巡禮」，巡禮中公布多個由馬仔構思的新節目，包括音樂節目《獅子山下好音樂》、初中生問答比賽《知情識趣31》、電視電影《我們的開學禮》及劇集《我們的畢業禮》。馬仔透露將擔任電視電影及劇集的總監製︰「喺劇同電影入面會同劉心悠一齊飾演大學教授，仲會有好多唔同藝人幫手，同時會起用好多新人，有啲係真正嘅大學生，仲有無綫藝訓班學生，都會畀機會佢哋發揮。」

問他在劇中與心悠可有感情綫？馬仔笑謂︰「我搵得佢當然有，我已經四年無拍劇，上次同佢合作拍《宮心計2深宮計》無感情綫。（加親密戲？）一定唔會加，我係總監製，唔可以有利益衝突。我哋拍校園劇係好『乾淨』，以學生利益行先。」