電影《食神》中有句經典對白--「炒飯要用冷飯炒呀！炒王！」道出炒飯美味的重點，就是米飯要粒粒分明，炒得夠乾身。揚州炒飯、鹹魚雞粒炒飯……在茶餐廳是快靚正之選，在酒樓是大夥兒分享的菜式。想食得更新潮和矜貴？即看以下推介。
生拆蟹粉 悅
銅鑼灣時代廣場近月新開的粵菜食府，由兩位來頭不小的大廚掌舵，點心大廚陳世輝師傅入行逾40年，曾任職新濠天地譽瓏軒及澳門永利宮的點心總廚；主理粵菜的是同樣有逾40年烹調高級粵菜經驗的歐陽松基師傅，他曾在福臨門掌廚20年，精於烹調鮑參翅肚，又擅長幾近失傳的經典手工粵菜。
一場來到想食得豪氣？可以點蟹肉桂花炒翅、鳳吞燉頂裙翅、生拆蟹肉官燕蒸乳酪。而經典的菜式亦很多，師傅更加入不少創新元素，如脆皮蔥油雞、鮑汁蝦籽柚皮、金梅陳醋咕嚕肉、陳皮牛肉餅等，統統傳統又考工夫。現時為蘿蔔當造的季節，特別推介高湯千絲日本大根，選用日本蘿蔔「大根」做食材，份外鮮甜和滑溜。炒飯方面，砂窩生拆蟹粉炒飯是招牌菜之一，是飯麵類最受歡迎的菜式。砂窩炒飯加入洋蔥和帶子，撈入三両金黃蟹粉，開蓋時蟹粉蟹膏的鮮香四溢，未吃完已經想添飯。
悅
地址︰銅鑼灣勿地臣街1號時代廣場13樓1301號舖
電話︰2838 3968
營業時間︰星期一至五11:30am-4pm，6pm-11pm；星期六、日11am-4pm，6pm-11pm
貼地鑊氣 金飯館
位於牛頭角的炒飯專門店金飯館，對烹調庶民美食有一種追求。這裏的炒底飯使用優質泰國米，雞蛋選用富蛋香的湖北蛋快炒。撈勻飯底後再快炒，才會令蛋液完全包裹每一粒飯，炒起時香氣十足。
必試的椒鹽豬扒飯即叫即炸，每小時限量供應4份，寧舍巴閉！特別在嚴選位於豬肋骨旁豬排位置的優質豬肉，以秘製醬汁及蒜蓉汁醃製約4小時，入味之餘令到口感更鬆化。
另一款香氣十足的是乾坤金窩蟹粉炒飯，選用生拆的大閘蟹及三點蟹的蟹肉入饌，可吃到啖啖蟹肉。飯底則選用泰國香米，並以鮮牛油起鑊及爆香薑米、鹹蛋黃、江蘇蟹粉同炒，吸引至極，最後於面層加入大量蟹粉及蟹肉，讓食客自行拌吃，令飯粒帶有啖啖鮮甜蟹粉的濃香味，提升味道層次。
金飯館
地址︰牛頭角牛頭角道323號地下J號1舖
電話︰6366 9538
營業時間︰11:30am-10pm
矜貴海味 船記
香港其實不乏主打經典手工菜式的餐廳，船記就是其中一間。店家最近推出多款特色手工菜，如工序繁複的經典鮑汁遼參伴柚皮，柚子皮需泡水1天，期間多次換水去除苦澀，遼參連同柚皮用鮑魚芡汁炆煮，令柚皮軟綿且遼參爽滑。除了手工菜式，當然亦有小菜，黃燜金湯海味炒飯以老雞、番鴨、唐排、雞腳等熬成黃燜金湯，再配上鮑魚粒、花膠粒、金錢肚及海参，矜貴無比。
船記
地址︰灣仔船街7號寶業大廈地下
電話︰2893 9688
營業時間︰11am-11pm
外送泰式 J.A.M.
疫情尚未過去，未必人人都外出吃飯，想吃美味的泰式炒飯，外賣都得！中環盈置大廈地下的J.A.M. Joint Asian Market是附近上班族吃傳統地道亞洲菜的地方，最近餐廳特意推出節慶聚會外送套餐。套餐價錢是$1,888（10位用），包9道自選亞洲美饌，可選4款小食、1款沙律、3款主食和1款甜品1款。客人可從24款菜式的餐單中任意選擇個人喜好。當中包括多款J.A.M.熱賣招牌菜式，如泰式炸蝦餅、韓式炸雞、新加坡炒粿條、香葉肉碎飯、牙車快沙律、香辣蝦米海鮮炒飯等。節慶聚會，在家中慢慢享用都不錯。
J.A.M. Joint Asian Market
地址︰中環干諾道中41號盈置大廈地下大堂
訂購網址︰https://delivery.zshospitality.com/jam/catering
（最少3天前預訂）
撰文及攝影︰Kiki（部分相片由餐廳提供）