MIRROR成員楊樂文（Lokman）、陳瑞輝（Frankie）和邱士縉（Stanley）參演新劇《IT狗》，Lokman和Frankie是上司同下屬關係，他們笑認是較「廢」的一群，而Stanley則是高學歷精英，這樣的分野帶來不少幽默趣事。現實中MIRROR成員發展不一，網友將他們分成「上、下弦」，三子被分為「下弦」會否感到失望？
ViuTV劇集《IT狗》今日開播，Lokman、Frankie和Stanley演繹不同類型的IT從業員，Lokman說：「我同Frankie比較多啲對手戲，因為同Stanley屬於兩個『門派』。我覺得我哋會顛覆到『IT狗』畀人嘅印象，你哋總係覺得IT狗係條褲抽到好高，件衫楔入褲頭，楔得好緊，頭髮又好油『立立』咁。但我哋唔係嗰種，我哋會人性化一啲，諗嘢會奇怪少少，所以成個團隊都三尖八角，缺點就係比較廢。」
姜濤懷疑擁有前世回憶和密碼 再談退休：姜B呢3年都攰喇...【下一頁】
Stanley笑言他們屬於歡樂「門派」，是認真地搞笑的一群，Lokman和Frankie就比較多廢話。Stanley說︰「IT界原來好多『吹水佬』，講到自己好勁，但原來唔識IT，唔係大家腦入面諗嗰種。」
Frankie則指今次劇集沒有刻意搞笑，反而節奏會令觀眾睇得好開心，第一次拍劇的他說：「好榮幸拍喜劇，各路英雄都好好玩。如果一入嚟要我拍正劇，好認真咁，我會好拘謹。一入嚟劇組，氣氛好歡欣，我就立即卸下包袱。而且導演好好，因應我角色的人物設定比較特別，每句對白，講嘢嘅節奏都同我傾過，咁一開波拍攝，當然都有NG，慢慢拿捏到角色性格，我覺得令我有所成長，係件好事。」他透露剪接師看完之後都大讚好睇、好笑，希望觀眾都會感受到他們的努力。
在劇中IT界有高低層次之分，現實生活中作為人氣組合MIRROR成員，難免在他們之間作出比較，近日有網友將《鬼滅之刃》的劇情套入MIRROR之中。在《鬼滅之刃》中，對抗正派「鬼殺隊」的反派「十二鬼月」就分別由 6位「上弦」及6位「下弦」組成，「上弦」的實力、戰鬥力比「下弦」明顯優秀。
網民將MIRROR十二子放入「上、下弦」，其中姜濤、呂爵安、盧瀚霆等出過單曲作品被視為「上弦」，而Lokman、Stanley和Frankie則被列為「下弦」。Lokman說：「有聽過呢件事，我覺得幾得意，畀你諗到嗰吓好嘢！我覺得有比較都好正常，佢哋（網民）可能諗得比較簡單同表面，『上弦』有solo歌，『下弦』冇，其實可能『下弦』拍劇多啲，『上弦』冇劇拍……成件事係幾抵死嘅！」
叱咤樂壇頒獎典禮丨MIRROR《BOSS》獲獎全場哄動 Anson Lo柳應廷首入叱咤十大【下一頁】
Frankie謂不會不開心，因為自己出身自選秀節目，習慣了被批評，已經學識好好調節自己心態。「我冇話一定要做solo歌，既然而家我喺ViuTV平台，咁多方面可以去揀，有劇做就做好佢先！唔止唱歌，其他嘢有機會嘅話就會試，最緊要裝備好自己。」
至於Stanley直認自己定位在戲劇方面，當然都期待推出有個人單曲，但不會太心急，「最緊要清楚自己做緊乜嘢，知自己想行嘅路係點，老實講比起姜濤，我相對地唔係咁『偶像』，要慢慢浸出嚟。繼續努力行呢條路啦，肯繼續行就實會成功！」
網民形容Lokman是「下弦」中最高位置的一人，他同樣愛演戲，「唔同範疇都可以學習，每次工作心態都係咁，亦慶幸接觸過主持工作，學識節奏掌握、字正腔圓，到你唱歌或者拍劇時總會有用。」《全民造星IV》的女團快將誕生，三子搞笑稱希望女團帶來更多的工作機會，多多帶挈師兄們，可以百花齊放。
髮型︰Denny Ku@Chic Private I Salon
化妝︰Rainbow Chung、Yumi Cheung@Annie G. Chan Makeup Centre
服裝贊助︰Sandro, Ports V, Zegna, Giuseppe Zanotti, Off-white, Jimmy Choo, ARTO.
服裝造型︰PIPA Creative
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
攝影：何家賢、黃敬博、林君茹
責任編輯：楊安莉