人氣男團MIRROR成員楊樂文（Lokman）、陳瑞輝（Frankie）和邱士縉（Stanley）最近參演ViuTV新劇《IT狗》，鏡仔12子發展各異，網民以動漫《鬼滅之刃》中的反派「十二鬼月」比喻12子，認為Lokman、Frankie與Stanley屬於人氣較遜的「下弦」成員。三人未有因此而不快，反而好好調節心態，努力走演藝路。
在《IT狗》中，Lokman、Frankie和Stanley演繹不同類型的IT從業員，顛覆外界標籤的IT毒男形象。Lokman說︰「我同Frankie比較多對手戲，因為我哋同Stanley係屬於兩個門派。我覺得我哋會顛覆到『IT狗』畀人嘅印象，外間總係覺得IT狗一定將條褲抽到好高，件衫攝入褲頭攝得好緊，頭髮又好油笠笠。但我哋唔係嗰種，我哋會人性化一啲，諗嘢奇怪少少，所以成個團隊都三尖八角，缺點就係比較廢。」
Frankie處男拍劇卸包袱
Stanley在劇中飾演高學歷精英，他自言屬認真地搞笑的一群，「IT界原來好多吹水佬，講到自己好勁，但原來唔識做IT，唔係大家腦入面諗嗰種。」Frankie則指劇集沒有刻意搞笑，反而戲劇節奏會令大家看得歡樂，首次拍劇的他說︰「第一次拍劇好榮幸，今次以喜劇形式拍攝，各路英雄都好好玩，好難得。如果一入嚟要我好認真咁拍正劇，我反而會好拘謹。入到劇組，大家已經好歡欣，我就立即卸下包袱。而且導演好好，因為我個角色好特別，所以每句對白嘅節奏都同我傾過；到開波拍攝，當然有NG，但慢慢拿捏到角色性格，我覺得演戲令我成長，都係件好事。」他透露剪接師看過劇集，都大讚好睇好笑，希望觀眾感受到他們的努力。
劇中，一眾IT精英有高低之分，而現實中三人同為人氣爆燈的MIRROR成員，網民難免有所比較，更將12位鏡仔以大熱動漫《鬼滅之刃》的人物區分。《鬼滅之刃》中，反派「十二鬼月」由六位「上弦」成員及六位「下弦」成員組成，上弦成員無論在實力及戰鬥力都比下弦優秀；網民將曾推出單曲的姜濤、盧瀚霆、呂爵安、陳卓賢、柳應廷及江生列為上弦六子，Lokman、Frankie、Stanley、邱傲然、王智德及李駿傑則屬下弦成員。
Stanley自認未夠「偶像」
Lokman笑談下弦心聲：「有聽過呢樣嘢，我覺得幾得意，畀你諗到嗰下好嘢！我覺得有比較好正常，大家可能諗得比較簡單同表面，好似上弦有solo歌，下弦就無；但其實可能下弦拍劇多啲，上弦無劇拍，不過成件事係幾抵死嘅！」至於Frankie自言是選秀節目出身，早已習慣被批評，已學識好好調節自己。「我無話一定要出單曲，既然依家我喺ViuTV平台，有咁多方面可以揀，而且有戲做就做好戲先，唔止唱歌，有其他機會嘅話，嚟到就會試，最緊要裝備好自己。」
至於Stanley直認自我定位在戲劇，雖然期待有個人單曲，但不會心急，「最緊要清楚自己做緊乜，同埋知道想行咩路。老實講比起姜濤，我相對地唔係咁『偶像』，要慢慢浸出嚟。所以繼續努力行呢條路，肯繼續行就實會成功！」被認為是下弦中排名最高的Lokman，同樣最愛演戲，「唔同範疇都可以係學習，每次工作心態都係咁，慶幸做過主持，學識講嘢節奏同字正腔圓，到你出歌或者拍戲時總會有用。」面對《全民造星IV》的女團已經誕生，他們搞笑稱希望女團帶挈師兄MIRROR有更多的工作機會，做到百花齊放。
髮型︰Denny Ku@CHIC Private i Salon
化粧︰Rainbow Chung、Yumi Cheung@Annie G. Chan Makeup Centre
服裝︰Sandro, Ports V, Zegna, Giuseppe Zanotti, Off-White, Jimmy Choo, ARTO.
造型︰PIPA Creative
撰文：楊安莉
攝影：林君茹、黃敬博、何家賢
美術：顏玉玲