【聲明】港生活網站並無進行電話推廣活動

出櫃後狂收同性網民私訊 小肥決絕Say No︰唔諗擇偶

發佈時間: 2022/01/17

小肥(徐智勇)前年在陳志雲的網上節目中勇敢出櫃,造就陳輝陽和林夕為他度身訂造歌曲《廢柴》。然而,林夕的詞卻不是關於出櫃,而是講述人的心魔,也是小肥的縮影,「以前好介意人哋點睇自己,解決唔到就逃避,原來廢柴係自己一手造成,根本你都唔係廢柴,係你覺得人哋會覺得你係廢柴。」

現年45歲的小肥,坦言人生最失敗的就是欠缺自信。「我成日幻想人哋點睇我,將自己縮到最細,最後解決唔到就逃避,唔敢去面對;但隨住公開性取向,我改變咗心態,open咗啲嘢。可能講咗出嚟,放低心頭大石,已經唔再介意人點睇,面對嘅嘢少咗,就少咗逃避。」小肥自嘲以前名副其實是廢柴,「以前嘅我無自信到谷底,驚被人話無料,明明有啲話題唔識,但唔夠膽話自己唔識,仲要扮無嘢。」

不慣應酬自認蝕底

內斂慢熱的小肥,坦言不慣跟別人打交道,「以前好怕去social場合,尤其跟Paco(黃柏高)去嗰啲酒會,有好多老闆同傳媒,我好驚唔知點做,擔心人哋覺得我係咁打招呼博咩,索性自己避開;但原來人哋會覺得見到又唔打招呼,畀人感覺好寸,但我明明好nice㗎嘛,就有呢啲誤會。我知呢啲性格喺娛樂圈好輸蝕,依家就覺得有乜所謂吖,都係打招呼啫,會敢於主動,其他人點諗係佢哋嘅事,自己放開咗。」

出道14年來,小肥擁有代表作《寵物》及《時光機》,但紅歌不紅人,他直言08、09年是他的最低潮時期。「當年第一隻碟成績唔錯,到第二隻碟就好大壓力。我想話畀人知自己係唱作人身份,所以由設計封面到歌曲,全部攬晒上身;但我太貪心,搞唔掂,後來唔能夠如期推出。07年出第一隻碟,到09年先出第二隻,新人可以虛耗咁耐㗎咩?所以都幾灰,好無自信。」

小肥的感情世界同樣不算順利,曾與同性伴侶拍拖十年,但最終仍分手收場。「之後我覺得好煩,唔敢再亂嚟,因為好難搵到一個人遷就你。我指嘅煩,唔係黐身嘅煩,而係要有一個人明白我嘅職業,工作時間日夜顛倒;我又極度需要獨處,另一半未必明,會話我做乜唔覆人,但我公平對待任何人,唔覆就全世界都唔覆,但對方又會講『我點同呀?我係你男朋友』。所以我真係暫時唔想再經歷呢啲嘢,唔想重新適應。」

曾相約網友見面

出櫃後,小肥直言多了同性戀者透過社交媒體主動結識他,「真係多咗私訊,但好多我唔理嘅,佢哋無啦啦hi我,又無相喎,hi乜啫!」是否要看過相片,知道對方是靚仔才會回覆?小肥哈哈大笑,「唔係靚唔靚仔問題,根本連對方係咩人都唔知,最後係女仔點算?哈哈。」但他承認曾相約網友見面,「真係好似朋友咁傾偈,但依家唔諗擇偶住,唔好煩喇,總之呢刻我say no,唔好搞我。」可幸家人對小肥出櫃相當支持,尤其是兩名胞姐,「佢哋叫我開心做自己,反而媽咪腦退化唔係好知,所以唔緊要啦!」

場地︰manta.house

化粧︰Yen Lai

髮型︰Bowie Lo@Admix Hair Styling

造型︰Patrick Ho

攝影︰林良明美術︰梁政敏

撰文︰倪小珊

出櫃後狂收同性網民私訊 小肥決絕Say No︰唔諗擇偶

小肥熱愛打拳健身,閒時到拳館練習兼消磨時間。(IG圖片)

出櫃後狂收同性網民私訊 小肥決絕Say No︰唔諗擇偶

小肥前年在陳志雲的節目上出櫃,事後兩人成為好友。(IG圖片)

出櫃後狂收同性網民私訊 小肥決絕Say No︰唔諗擇偶

小肥早前與鄧小巧、許廷鏗及6號舉行音樂會。