黃偉文重提黃柏高改歌名被指記仇 不忿被嘲「方丈」開火要求網民道歉

黃偉文（Wyman）日前喺社交平台點名批評有「金牌經理人」之稱嘅黃柏高（Paco）唔尊重創作人心血，當年經常在未有詢問的情形下擅改歌名，而佢當年寫畀楊千嬅嘅《MR.》就係其中之一。

同場加映：兄弟送驚喜爆男兒淚丨黃耀煌感激張國強點醒放棄轉行 靜待突破：我想成為家人嘅驕傲

{{hket:ul-video id="5149"}}{{/hket:ul-video}}

Wyman寫下《MR.》當中兩句歌詞「可想過你那弱點 就是我剛剛想要」，留言表示︰「而家個歌名叫《MR.》，離題到爆又老套，只不過係Paco旗下好多好多首粒聲唔出，自己求X其改個歌名，到出咗街我先知嘅歌之一。其實問吓我先都係一個電話啫，又有幾難呀。如果我唔係每一個字都執著，要撚到最好先見人，我就唔應該做填詞人啦。唔好立亂改我啲嘢，更何況係歌名。呢啲咪叫唔尊重囉，所以唔好郁作家嘅心血，否則真係記你一世。」

{{hket:inline-image name="9bfa16fccb14a9b543a1f62a5aad6406.jpg"}}{{/hket:inline-image}}

唔少網民都認同《MR.》「改壞名」，同時好想Wyman透露呢首歌原本叫咩名，留言追言：「好奇呢首歌原本係叫咩？當年好鍾意呢首歌，但唔明點解叫《MR.》」、「嘩真係而家先知，其實好鍾意呢首歌，但永遠諗起歌名」、「講唔講得原本其實叫咩名？」

Wyman最後都冇「開估」，其實楊千嬅之前都喺訪問中提過《MR.》原歌名係《陳國強》，因為呢首歌係想講一個男人，所以用一個普通嘅男人名做歌名，但與當時StarEast老闆陳國強同名，為免誤會就改成《MR.》，不過當時楊千嬅未有講出改名原來冇經填詞人黃偉文同意。都有網民「解讀」其實《MR.》呢個名更有意思，「其實都係泛指所有男人，用一個MR.形容咪仲好，同埋當年楊千嬅同鄭中基拍拖，一個叫Miriam一個叫Ronald，其實用MR呢兩個字母代表佢哋好sweet！」

睇番資料，呢首歌係楊千嬅2002年嘅作品，換言之呢件事已經係發生喺廿年前，有網民質疑Wyman事隔咁多年先拎出嚟講，即時觸動到佢神經，「咁幾耐先講得？3年？5年？10年？個標準由你訂？有冇聽過metoo？好多case都幾十年，有冇人好似你咁問點解而家先拎嚟講？真係有發生過嘅事我幾時都有權講。」有網民更加話Wyman係小器「方丈」，嬲到Wyman要求對方道歉，但佢得唔到回應，最後決定block咗呢位網民，冇眼屎乾淨盲。

撰文：黃蘊姿