李佳芯（Ali）舊年同陳炳銓結束7年情後，有報道指佢同「蟲草大王」陳恩德（Mark）拍拖，畀人影到二人在九龍區一間五星級酒店密會兩小時，事後Ali表明二人只係生意上合作夥伴。不過有自稱「Ali姊妹」嘅人再向傳媒放料，透露Ali前年未同陳炳銓分手時，Mark已展開追求攻勢，而當Ali回復單身後，Mark仲同人講自己終於贏得美人歸。「Ali姊妹」更提供「男友視角」、「定情禮物」鑽石心口針嘅相片，以及二人嘅合照證明佢哋係拖友。
同場加映：兄弟送驚喜爆男兒淚丨黃耀煌感激張國強點醒放棄轉行 靜待突破：我想成為家人嘅驕傲
日前Ali果斷發長文撇清關係，指自己2020年認識陳生到而家，每次只限於工作洽談，從沒有發展過任何關係，今後亦不會有任何發展空間。講到過去、現在同將來都同男方冇感情轇轕，完全唔畀機會對方！
相關新聞：秘戀一年？︳李佳芯發聲明釐清同蟲草大王關係 「今後不會有任何發展空間」（下一頁）
Mark對於Ali發長文撇清關係表示無奈，指可能Ali係演藝人有包袱，又話Ali性格好似鐵咁硬。佢表示舊年爆出緋聞之後同Ali都少咗聯絡。今日（1.26）於尖沙咀舉行嘅宣傳活動，Ali本是嘉賓之一，但發通告通知傳媒採訪時，其名字卻「被消失」，Mark指因為TVB一啲唔合理嘅要求，佢叫Ali唔使嚟。
Mark今日出席活動時，即被大量記者圍訪，佢開估TVB提出啲乜嘢無理要求，「要叫埋律師嚟，講出嚟怕被TVB告，聽埋就知咩係唔合情理！其實係咁，邀請Ali時，當然佢同意先叫（我）公司嘅人聯絡經理人，經理人嘅回覆，係答應，去到最後忽然之間經理人有特別要求，佢嘅要求︰第一event（活動）上唔可以同陳生合照，即使上台同大合照，一定要同陳生維持距離，要隔幾個人先可以影相；陳生同Ali唔可以同時接受訪問……咁喺我公司立場，係好冇禮貌，甚至帶侮辱，即時問咗點解你臨尾有呢個要求？同經理人對話唔係我……佢（Ali）有send畀我……」
Mark指Ali回覆佢嘅訊息係私人內容，意思係話應公司要求，經理人會再作跟進、回覆，Mark︰「我話唔需要喇！唔需要唔係Ali問題，我哋需要嘅係尊重，你諗吓今日一個event唔使影相咩？我要聲明，我都唔係鍾意影相嘅人，入面（活動）一幅都唔影，我好怕影相！最後cut咗唔使Ali出席，呢個係TVB問題！已經出晒信，亦抽起所有TVB廣告，我每年千萬計嘅客戶而換得咁樣待遇，佢哋簡直侮辱緊我！」
記者問到Mark有冇彎轉，佢就話叫樂易玲自己交代一下，至於問到佢係咪追求Ali時，就話私人問題唔詳細答，Mark：「我單方面，佢（Ali）係我好朋友嚟嘅，就算今日佢冇嚟，照可以送番NFT畀佢，我係好冇所謂。其他私人事喺呢分鐘唔答。佢想點講我都尊重，尊重佢講任何嘢，唔需要講任何說話過去爭抗。」問到佢對Ali發聲明劃清界線會唔會感到失望，Mark再次強調：「佢想點講都冇所謂，我原則係唔好特別傷害佢喇！佢係一個好人，脾氣耿直啲啫。」
網上有人揣測係Mark主動放料（合照流出），Mark實牙實齒否認︰「我哋其實有研究……我只講一次，一定唔係（我放相），我都好遺憾！」澄清亦唔係為咗宣傳，重申對TVB突然有呢啲要求意想不到，「其實你唔想接job，第一日就唔好接，唔好接咗最後一分鐘改。」至於會唔會再用TVB藝員宣傳公召產品？佢就話要同同事再研究，同時就話同TVB合作廿幾年，唔會告TVB，「年年落（廣告），接近二千萬客戶……有幾多呢？唔明點解對我公司態度咁差，可能我好蝦囉！我就要話畀你知我唔好蝦囉！」問到今日係咪特登搵「翻版Ali」蔡潔嚟做女方替身，Mark就笑住話唔關事，「佢（蔡潔）女一嚟喇！翻咩版吖！」
撰文：黃蘊姿