蔡嘉欣列渣男特徵叫姊妹們提防 男友水洗唔清慘被誤會偷食

蔡嘉欣入行冇耐就是非多多，選港姐時已係當紅KOL，有傳佢極度拜金，因結識有錢ibanker新歡撇奀茄舊愛，但佢澄清自己先係被飛嘅一方。現年27歲嘅佢，今日喺IG Story突然開火鬧爆渣男，令人不禁聯想到佢係咪又再遭受情傷？

蔡嘉欣有少少激動咁大講渣男特徵：「渣男做錯事永遠好多藉口，唔會承認自己錯然後將問題推卸到你身上，令你開始懷疑係咪自己唔夠好？」又指自己好憎男人扮好人︰「渣男可唔可以唔好咁厚顏無恥？認咗自己渣，好過繼續扮好人！一次不忠，百次不用！我希望女孩們能夠清醒過嚟，愛自己，唔好委曲求全，唔好為渣男搵諸多藉口，到最後痛苦嘅都係你自己，別人一啲都唔會為你感到可惜。」

{{hket:inline-image name="258145905_4445181345519231_5643503258228419698_n.jpg"}}{{/hket:inline-image}}

唔少網民好自然諗到，係咪蔡嘉欣男朋友做咗咩錯事令到佢咁激動？蔡嘉欣post埋好姊妹陳詩欣嘅「溫馨提示」︰「可唔可以post番唔關你男朋友（事）？笑死我！你咁寫係人都覺得佢偷食。」總算真相大白！蔡嘉欣解釋係聽到身邊一啲渣男故事而好憤怒，「唔係講自己男朋友，大家唔好誤會。」

蔡嘉欣同男友Derek拍拖5年多，如膠似漆，女方亦唔介意男友高調曝光，狂晒二人親密合照。有指男友好錫佢，好支持佢參選港姐，仲喺將軍澳天晉租咗一個月租近二萬五元嘅單位，方便佢出入將軍澳電視城。

不過幸福得來不易，認識Derek之前，蔡嘉欣經歷一段不堪回首嘅戀情，佢曾經公開話：「分手原因我都唔想去回憶……畢竟已經事過境遷，放下雖則放下但做唔到朋友。至於現任（男友），係分手後一段時間因為緣分而結識。」當時有知情網民幫佢「補完」，話蔡嘉欣同前度一齊開網店兼同居，點知有一日男方突然講分手，搞到蔡嘉欣要喊住返娘家；後來睇IG留言，先知道原來係男方識咗第二個。而睇番時間線，相信就係佢奀星前男友吳子沖。

圖片來源：Instagram

撰文：黃蘊姿