【聲明】港生活網站並無進行電話推廣活動

正職直播帶貨 苑瓊丹賣兩餸飯誓做全港第二

發佈時間: 2022/01/28

苑瓊丹(苑仔)去年大部分時間在內地工作,早前返港與家人團聚,但過年後便要匆匆返內地掘金。甚有生意頭腦的苑仔今年滿腹大計,除了瞄準內地帶貨直播熱潮,更落實在本地投資兩餸飯生意;不過她賺錢之餘,更多的是回饋社會,「希望派飯畀啲公公婆婆,啲菜式仲要係有營養嘅,舖頭名我已經諗埋喇!」

苑瓊丹本月初回港後,便馬不停蹄準備迎接新年。「過年係中國人好重要嘅節日,一定要同屋企人過,就算再返去內地要隔離21日,我都要返香港。」苑仔每年至少斥資六位數字辦年貨,「太多嘢要買,臘腸、蝦子麵我都買100斤,買嚟送禮;又要訂盆菜,新年我淨係食盆菜,唔使費神煮咁多。」

演戲當副業

苑仔近年涉獵不少生意,包括即食餸包、牛雜店等,今年她銳意擴大其飲食版圖。「我之前已經想開舖賣兩餸飯,疫情下大家少去街市,唔使自己洗切煮,幫輕好多主婦,我老公都好鍾意食。」苑仔滔滔不絕說:「每日啲餸未必賣得晒,我哋可以送畀老人家食,要煮啲有營養嘅,做下好事。我朋友知道邊度有平靚正嘅貨源,佢哋負責菜式,我負責宣傳,舖頭名我都諗好,叫『超原味』,我哋唔使做全港第一,但要做全港第二。」

至於與陳浩民合夥的牛雜生意,苑仔透露已在內地開逾100間分店,問賣牛雜是否已賺幾桶金?她笑言︰「無桶,啲桶穿窿又漏,生意做大自然成本增大,都未分錢,儲住先。」她亦想專注直播帶貨事業,「之前最勁賣過幾百萬嘅貨,我好鍾意買嘢,識買又識講,試過講足十個鐘,去咗三次廁所,下次我要用成人紙尿片,廁所都唔去。」她指直播帶貨才是正職,副業是拍戲,「呢個係我終極目標,但要儲番fans先,拍戲人哋就知你係邊個,帶貨鬼知你係乜水。」談到李國麟和江華在內地帶貨失敗收場,苑仔指運氣能力各佔一半,「可能佢哋未熟悉技巧,或者無觀眾關注,係要慢慢儲,心急無用。」

場地︰原味煮意、Lun廚與Din娜

攝影︰林良明

美術︰梁政敏

撰文︰倪小珊

正職直播帶貨 苑瓊丹賣兩餸飯誓做全港第二

苑仔虎年大計多多,勢必擴大其生意王國。

正職直播帶貨 苑瓊丹賣兩餸飯誓做全港第二

苑仔愛吃盆菜,貪其菜式豐富,又不用自己下廚。