余德丞開工敷面膜被封貪靚王

余德丞、丁子朗、戴祖儀及伍樂怡等昨日宣傳劇集《青春不要臉》，余德丞因拍劇期間敷面膜，加上開工時經常受傷，被眾人封為「貪靚王」和「地獄黑仔王」。他說︰「有場戲我要被人爆樽，本來糖膠玻璃樽唔會整親，可能武師驚NG，好大力咁扑落嚟，結果我都擦傷，嗰一刻我都驚毁容㗎，我咁貪靚！」

余德丞與丁子朗最近每晚開直播，希望宣傳劇集及了解觀眾反應，他們說︰「試過有個叫Kelly嘅女仔要求加入直播，我哋以為係伍樂怡，點知原來係來自澳洲嘅粉絲，我哋真係好易被人呃。」同場的戴祖儀最開心觀眾睇劇後對她改觀︰「今次喺劇中有好多突破，好似被掟蛋糕、掌摑、裸背同爆喊，大家感受到我嘅委屈，肯定我嘅演出。」

採訪︰Pauline