為食一族除了愛到新食店試菜，當然希望每次「掃街」，也可以一次過試勻各式風味美食；其中，荃灣區可算得上是餐廳菜館集中地。無論是想歎日式甜品、主打健康的生酮西餐，又或想懷舊一番歎傳統點心，來到荃灣，大家一定不會失望呢！
自家製特濃牛乳甜品 豆乳狂人
不少甜品店、雪糕店都經常標榜用3.6、4.3北海道牛乳做甜品，愈濃愈多人追捧。食開特濃牛乳甜品的朋友，可以試試這間。食店以特濃豆乳馳名，自家製豆乳濃度達6 - 7.6度，濃度幾乎是一般豆乳的1倍，店內的豆乳雪糕、豆花、豆乳茶和豆乳奶蓋，豆味爆標之外，甜品包裝夠日系，搣甩豆品店的老套味。
小店由最初以家庭經營模式於沙田屋苑開外賣店、賣支裝豆乳及芋圓糖水，到最近在進駐海之戀和樂富廣場，不單設有座位，甜品花款更加多。荃灣店設有半開放式廚房，內放了全港首部日本研發的巨型磨漿機，機價過100萬元，選用加拿大非機因改造黃豆做特濃豆乳。磨漿機的最大特點是可做到連豆渣一起熬煮，所以比一般磨漿機研磨的豆乳更加濃郁。店內的豆乳香滑、豆香味天然原始，也不像日本豆乳般偏甜偏奶感。
甜品的用料不俗，有日本抹茶、紅豆、韓國芝麻等。作為豆漿店，這店的食物和飲品款式極之豐富，甜品是極度精采的，有雪糕筒、芭菲、豆花、三色芋圓和桃膠等系列，飲品有7.6特濃豆乳、豆乳茶和豆乳奶蓋系列，還有5款新派粢飯和10多款以豆品為主的小吃。
SOYmart by 豆乳狂人
地址︰荃灣大河道100號海之戀商場2樓2036號舖
營業時間︰11am - 10:30pm
---------------------------------
偽Gampling食生酮西餐 Corefy
潮流興Glamping，想打下卡，但又不想背沉重裝備，可以去荃灣這Cafe。其中兩位店主當了十多年跆拳道教練，在荃灣開了佔地5,000呎的一站式多元活動中心，提供跆拳道、體操、魔術班等課程；另一邊開Cafe讓一班等待子女下課的家長們醫肚。
店主們特意裝設落地玻璃窗提高採光度，也在店內種滿植物襯托，最吸引眼球當然是店內的波希米亞民族帳篷，兩手揈揈就可以Glamping，夠便利。那麼「Glamping」食乜好？運動型店主提倡健康飲食，店主之一的Gigi奉行生酮飲食法，她特別設計了生酮餐單放到店裏，奉行少糖、少碳水化合物也低鹽，也用上健康食材。
菜式還用上有機的番茄、低脂的芝士及醬料等烹調，即使甜品如巴斯克芝士蛋糕都是採用低升糖指數的羅漢果糖及日本稀少糖製作，用杏仁粉取替麵粉。
Corefy
地址︰荃灣享和街68號2樓全層
電話︰4685 8033
營業時間︰11am - 10pm
---------------------------------
重現70年代茶樓點心 老馮茶居
飲茶歎一盅兩件是老香港文化，隨着新派茶樓愈開愈多，舊式茶樓逐漸被淘汰。有心人馮先生為重現這種老茶居味道，年前在元朗開了一間老馮茶居，這懷舊茶居最近更殺入荃灣再開分店。
新店以六、七十年代屋邨為主題，全店掛滿舊式大牌檔的紅色膠燈罩燈飾，也將懷舊士多、山貨雜貨店活現在店內，另一邊更有舊式冰室座位，感覺好似時光倒流一樣。這裏有老練的點心師傅坐鎮，供應多款懷舊味道如鵪鶉蛋燒賣、炸雲吞、沙嗲金錢肚和咖喱魷魚等。店內更供應懷舊砵仔蒸飯、手拉腸粉、中式甜品等，定價貼近屋邨酒家價錢，包你食過返尋味！
老馮茶居
地址︰荃灣眾安街68號荃灣千色匯ll期地下G30-G33號舖
電話︰2366 8188
營業時間︰8am - 10pm