《Mr. Stranger》｜Anson Lo曾壓力爆煲憂達不到外界期望 喜見MIRROR12子各有發展路向

人氣男團MIRROR成員「教主」盧瀚霆（Anson Lo）早前推出第八首個人作品《Mr. Stranger》，MV上架至今觀看次數已超過350萬次。Anson Lo表示上次《Megahit》一歌大受好評，今次製作新歌的過程中更添壓力，皆因自己每次創作時都想超越上一首歌的質素，為「神徒」們帶來停不了的驚喜。

{{hket:ul-video id="5381"}}{{/hket:ul-video}}

去年壓力爆煲的Anson Lo，總是擔心達不到外界的期望。《Mr. Stranger》是他今年第一首個人單曲，是首暗黑風的跳唱歌。他由頭到尾構思主題和MV劇情，歌詞中講述自己真實的內心世界、精神狀態。「首歌係講自己上年年尾感受、壓力來源。觀眾、樂迷覺得Anson Lo係一個點樣嘅人？ready到接受我嘅新形象未？我會有唔同面向，如果大家睇到我嘅dark side會唔會接受到呢？」

{{hket:inline-image name="IMG_0464.JPG"}}{{/hket:inline-image}}

Anson Lo在MV中以吸血鬼造型登場，一頭黑髮兼戴上紅色隱形眼鏡，一眾神徒睇完MV都表示暈晒大浪。吸血鬼、歌詞內容，是Anson Lo的心情寫照，「吸血鬼呢個主題，係我有次無啦啦諗起嘅。吸血鬼好鍾意吸血，但係佢喺白天時，好驚人類睇到自己真面目，好驚大家會揭穿佢係吸血鬼，佢好擔憂大家會有乜嘢反應……我覺得吸血鬼驚人哋披露佢真實一面同埋性格，係同呢首歌嘅主題緊扣得到。」

《Megahit》一歌大獲好評，Anson Lo在去年韓國樂壇盛事《Mnet亞洲音樂大獎》（MAMA）榮獲「最佳亞洲新人獎（華語地區）」，他表示超級開心同榮幸。一向高要求的Anson Lo坦承壓力有增無減，「好開心上次首歌有好多人鍾意……之後……其實好驚自己創作唔到一首同《Megahit》完全唔同風格嘅歌。最大壓力係要諗曲風，要同以前完全唔同，同時又要係跳唱歌，所以製作過程裏面好困難，好多嘢要考慮。」

雖然《Mr. Stranger》已經是第八首Solo歌曲，但壓力越來越大，Anson Lo說︰「因為自己每次創作時都想超越上一首歌嘅質素，每一次都想諗啲新嘢；人嘅腦袋有限，唔係每次都諗出色嘅idea、好橋、好題材、好主意……每一次嘅壓力就係在於『自己夠唔夠多變化』？同埋『變化夠唔夠大呢』？」

{{hket:inline-image name="IMG_0461.JPG"}}{{/hket:inline-image}}

MIRROR成員李駿傑（Jeremy）早前推出第一支單曲《半》，同時亦令Anson Lo憶起兩年前，剛剛「單飛」出Solo歌曲之時，「諗起自己第一次推出嘅歌曲係《一所懸命》， 當日我攞住部手機，手係咁震，好驚……見到自己個名係個MV度出現，好奇妙，嗰種感覺到而家仍然歷歷在目。真係太深刻嘞！自己竟然係一個Solo歌手？喺音樂平台上面竟然有自己嘅歌……」

{{hket:inline-image name="3.jpeg"}}{{/hket:inline-image}}

去年，Anson Lo於歌影視三棲都有不錯的成績，他提到，2022年的音樂發展方向會以跳唱歌曲為主，「因為去年fans畀咗我好大嘅信心同肯定。」而電影方面，1月時剛剛完成一齣電影的拍攝工作，「係一套驚慄、懸疑電影嚟嘅，好開心，係新嘗試，學到好多嘢。」

{{hket:inline-image name="IMG_0463.JPG"}}{{/hket:inline-image}}

除了Anson Lo續有新嘗試之外，其他MIRROR成員也有不同的演出機會。Anson Lo透露：「今年公司會推出幾個合唱計劃，MIRROR隊員各有合唱歌；電視劇方面，大多數MIRROR成員都會有份參與。」他承認MIRROR 12子很久沒有聚在一起，「但每個人都係做緊自己想做嘅嘢。大家有唔同嘅演出機會，唔同人有唔同路向。」

服裝：Paul Smith, Joyce, Giuseppe Zanotti
化妝：Rainbow Chung @Annie G. Chan Makeup Centre
髮型：Denny Ku @CHIC PRIVATE i SALON

撰文：林惠珊