《愛‧回家》穿騎呢服組男團 何啟南︰幾驚叫我唔着衫

處境劇《愛‧回家之開心速遞》前晚一集，講述雷公（白彪飾）因妒忌大龍生（羅樂林飾）組成的「大四喜」爆紅，故與John（何啟南飾）及保鑣Dino（陳國峰飾），另組男團「雷聲大」硬撼大四喜；雷公找來潮偉（袁文傑飾）擔任組合的形象顧問，但眾人衣着騎呢，John更穿上桃紅色西裝外套襯白色喱士通花恤衫，下身則穿白色現代褲加薄紗，令他非常尷尬，不時用雙手遮住下身重要部位。

何啟南昨日接受本報訪問時，表示服裝是由監製挑選︰「套衫對我嚟講都唔算大挑戰，我幾驚佢叫我唔着衫。（完全唔尷尬？）你睇覺唔覺得我尷尬？覺得就代表我交到功課啦！（雷聲大會唔會出歌？）暫時我都未知雷聲大會唔會好似大四喜咁演出，如果有就真係好囉，等監製同編劇安排。」