【聲明】港生活網站並無進行電話推廣活動

男歌手獎爭議疑掀歌迷罵戰 姜濤盧瀚霆合力拆彈

發佈時間: 2022/04/26

《CHILL CLUB推介榜年度推介21/22》前晚假九展Star Hall舉行,人氣男團MIRROR成大贏家,橫掃九個獎項,「教主」盧瀚霆(Anson Lo)更首奪「年度之歌」及「年度男歌手」金獎。但賽果惹來網民質疑,更有傳「姜糖(姜濤粉絲)」及「神徒(Anson Lo粉絲)」對罵,姜濤及Anson Lo受訪時合力平息風波。

有主場之利的MIRROR前晚成為大贏家,盧瀚霆坦言沒想過連奪兩個大獎:「有12位成員嘅努力,先促成每一個獎,全靠大家一齊經營,無MIRROR就唔會有每一個工作機會。」提到有網民質疑賽果造假,戥男歌手銀獎得主姜濤不值,姜濤聞言主動回答:「我想講,邊個攞獎我哋都應該開心,樂壇每個人攞獎都值得開心,更何況係自己隊友?希望大家唔好諗太多!」

呂爵安奪新人銀獎已偷笑

有指姜糖及神徒在網上掀罵戰?姜濤坦言一直知道此事:「組合就係咁,粉絲之間會有啲爭執,但我哋(隊友)嘅感情一定唔會因為呢件事而唔好。我亦唔會叫fans投MIRROR,投自己鍾意嘅就得;如果每年都係MIRROR或我哋嘅個人單曲得獎,代表樂壇無進步,唔需要每年都係我哋,我甚至希望以後每年,有比我哋更犀利嘅人出現。」Anson Lo坦言隊內競爭及外界比較在所難免:「但外界無論點比較,都唔會影響我哋感情。」前晚疑有姜糖不滿賽果提早離場,姜濤說:「可能有啲fans太錫我哋,我理解,但音樂無勝負之分,只有享受。」同場的張敬軒失落男歌手獎,他大方說:「再嚟過囉!我仲未退休,今年MIRROR個熱度大家都見到,Anson Lo無論喺歌同廣告都好勁,佢攞都係理所當然。」

至於呂爵安(Edan)奪新人銀獎,再次不敵MC張天賦,Edan搞笑說︰「我見到Lokman(楊樂文)同肥仔(梁業)喺後面喊,我有獎已經偷笑啦…我同MC私下都friend有兩句,大家關係唔會因為呢啲比較而出現裂痕。」另外,MIRROR昨日推出新團歌《Innerspace》,12子在MV中大玩「水舞間」,在水池中勁舞,他們拍畢後由內到外全濕,相當落力。而前晚頒獎禮發生小插曲,許廷鏗在台上獻唱時,疑有工作人員忘記熄咪,令電視直播時有一神秘男聲說話,跟許廷鏗的歌聲重疊。事後許廷鏗忍不住在IG放負表示不開心,而昨日他再度發文,表示已接受ViuTV製作團隊致歉,他亦已經釋懷。

採訪:Pauline

攝影:林良明

美術:梁政敏

男歌手獎爭議疑掀歌迷罵戰 姜濤盧瀚霆合力拆彈

Anson Lo憑《Megahit》奪「年度之歌」大獎。

男歌手獎爭議疑掀歌迷罵戰 姜濤盧瀚霆合力拆彈

Edan只得新人銀獎不覺失望。

男歌手獎爭議疑掀歌迷罵戰 姜濤盧瀚霆合力拆彈

鏡仔在新歌MV中大玩「水舞間」勁舞。

男歌手獎爭議疑掀歌迷罵戰 姜濤盧瀚霆合力拆彈

張敬軒(左)與林家謙齊齊有獎攞。

男歌手獎爭議疑掀歌迷罵戰 姜濤盧瀚霆合力拆彈

湯令山與姜濤合唱時非常興奮,心情大靚。

男歌手獎爭議疑掀歌迷罵戰 姜濤盧瀚霆合力拆彈

許廷鏗獻唱期間,大會出現技術錯誤。