【聲明】港生活網站並無進行電話推廣活動

廣告收益上繳2歲囝囝 陳山聰︰我幫佢袋住先

發佈時間: 2022/04/27

陳山聰近日挾無綫劇《金宵大廈2》的熱潮,廣告一單接一單。昨日山聰拍攝健康食品廣告,他笑言廣告酬勞都會收歸快將兩歲的寶貝仔陳霆軒(Jaco),現時只是代兒子「袋住先」,果然是廿四孝爸爸。

陳山聰昨日穿上一身輕巧便服拍攝廣告,問這次廣告酬勞是否滿意?他笑笑口表示︰「OK啦,都唔係我袋㗎啦,都係阿仔袋,我都係代佢袋住先咋。」他指自從組織家庭後,生活變得更有動力,凡事都會以囝囝行先。山聰說︰「會諗囝囝嘅生活同將來,所以今次收益都係全數撥捐陳霆軒小朋友,但係開心同感恩嘅,(今次)都係《金宵大廈2》帶挈咗一個好感恩嘅收穫。(多咗其他收穫?)之前有商場搵我拍嘢,依家又有廣告,希望各行各業都開始復甦啦!」

預告《金宵2》結局有彩蛋

至於會否父子檔拍廣告?山聰笑指︰「我問下我大佬(兒子Jaco)肯唔肯先,或者試下搵胡定欣同佢拍應該OK,佢哋好friend。」山聰又透露早前因疫情與兒子相處了四個月,發現囝囝長大不少,他開心表示︰「以前叫佢戴口罩,佢好快就扯落嚟,但依家佢一出街,自動自覺攞口罩戴;同佢去公園,知道要影相又會自己扯低口罩,擺埋甫士笑晒口。佢搶我鏡唔係今時今日嘅事,由出世到依家都搶我鏡,但多謝大家對佢嘅愛戴。」

《金宵2》本周迎來結局篇,山聰大感不捨︰「結局會有少少彩蛋,個彩蛋仲係令人意想不到嘅,希望會掀起少少高潮。大家記得上一輯個結局嘅話,李施嬅係遇到一個飛機師嘅陳山聰,今次會係點呢?大家睇就知。」

採訪︰倪小珊

攝影︰林良明

美術︰梁政敏

廣告收益上繳2歲囝囝 陳山聰︰我幫佢袋住先

山聰經常陪囝囝玩耍,享受親子時光。(IG圖片)