【聲明】港生活網站並無進行電話推廣活動

最意想不到的禮物 陳山聰︰刻名瑞士軍刀

發佈時間: 2022/05/05

母親節快將來到,未知子女們是否已經準備好禮物送給摯親?一份具意義、有紀念價值的禮物,相信能讓收禮者感到窩心與感動;一份意想不到的禮物,更能讓收禮者驚喜萬分。

陳山聰與胡定欣及姚子羚等組成「Crazy Runner」一起跑步,老友鬼鬼。定欣與子羚於18年到瑞士拍攝旅遊節目《兄弟姊妹去旅行》,兩人當時送了一把瑞士軍刀予山聰,讓他喜出望外。

提起這把軍刀,山聰即說︰「識咗佢哋咁多年,從來都無送過禮物畀我,估唔到嗰次佢哋去瑞士竟然記得我,買把軍刀送畀我,仲要刻埋名,搞到我好開心。」山聰笑言︰「原本以為兩姊妹會送當地出產嘅名牌手錶畀我,但最後收到軍刀都好開心,因為都係瑞士嘅特產,哈哈!」

姚子羚︰ 由相砌成嘅人像畫

至於向山聰送上軍刀的姚子羚,收過最意想不到的禮物,原來是一幅由自己相片砌成的肖像畫。她高興道︰「其實係嚿年嘅生日禮物,呢幅畫係由周家蔚嗰屆嘅港姐好朋友夾份砌畀我,後尾我先知原來佢哋問我助手攞相,去砌成一幅我嘅人像畫。」

子羚直言收到禮物時非常驚喜︰「呢份禮物好有心思,有啲相連我自己都無印象,能夠喺一幅畫入面睇番晒自己歷年嘅相,真係好特別。依家呢幅畫暫時仲未有地方掛出嚟,我會好好收藏先,等將來有空間我就會掛出嚟慢慢欣賞。」

戴祖儀︰ 手造木製夾萬

問及最意想不到的禮物,「圈中小富婆」戴祖儀(Joey)表示是在中學時期收到,由幾個同學合力砌成的夾萬。Joey說︰「讀書嘅時候大家送禮物都係講心意同心思。嗰一年我生日,幾個同學一齊砌咗個木夾萬,最得意係個夾萬好似真嘅一樣,要扭四個掣先可以開到。」

Joey笑言同學可能知道她貪錢,所以送她夾萬,「個夾萬到依家仲放喺屋企,不過已經唔可以用啦,因為佢哋當時整錯咗把鎖,永遠都鎖唔到。雖然唔可以當一個真嘅夾萬咁用,但我有用嚟放啲飾物,變成一件好靚嘅擺設。」

撰文︰Pauline

最意想不到的禮物 陳山聰︰刻名瑞士軍刀

山聰與李施嬅主演的《金宵大廈2》獲網民好評。(資料圖片)

最意想不到的禮物 陳山聰︰刻名瑞士軍刀

子羚圈中人緣甚廣。(資料圖片)

最意想不到的禮物 陳山聰︰刻名瑞士軍刀

人像畫由相片組成,認真有心思。(資料圖片)

最意想不到的禮物 陳山聰︰刻名瑞士軍刀

收到同學的自製禮物,讓Joey相當感動。(資料圖片)