掌握財富密碼︳細龜黃一山傳授大灣區歎世界大法 勸賣樓移居內地：一萬蚊幾好生活

演員「細龜」黃一山90年代喺唔少周星馳電影中擔任配角而出名，自2003年開始喺內地發展，更舉家移居內地。近年佢不時都會喺社交平台分享近況同娛圈八卦，近日佢喺抖音分享「財富密碼」，引起唔少網民討論。

同場加映： 姜濤後悔自爆「A0」要永遠成謎 入行後媽媽朋友突增 姜糖直呼奶奶 

{{hket:ul-video id="5727"}}{{/hket:ul-video}}

細龜拍咗一條「齋噏」嘅片段，提到佢同一個香港演員朋友傾電話，對方講到呢兩年都冇咩工作，一直都係靠食老本，而錢都使得七七八八：「咁佢問我有咩辦法，我就同佢講：『首先係將香港層樓賣咗，套現番幾百萬，然後呢，成個家庭搬返嚟大灣區住，因為大灣區呢有啲城市房價（樓價）都係好平，幾千蚊一方（一平方），你買夠一百方，可能都係花你幾十萬，你買又得租又得，租都係花你三幾千，咁跟住你啲錢就擺入銀行，一年呢就可能有三厘息，咁你500萬一年就會有15萬利息，咁你每個月就有萬幾蚊使囉！喺內地萬幾蚊就夠晒啦』」

{{hket:inline-image name="36.JPG"}}{{/hket:inline-image}}

不過朋友就表示朋友、家人、同事、同學全部都喺香港，唔可以走。細龜就自豪咁回應：「點唔走得呀，我19年前，2003年我夠一家大細搬嚟內地住，咪幾好囉，行得走得食得瞓得，肥肥白白。人到咗幾十歲，就應該開開心心準備迎接退休生活，仲要每個月擔心開支，病都多啲啦。真係嘅，香港物價指數太高，隨時一個月（使）幾萬蚊；但內地呢其實一萬蚊左右，（就有）幾好嘅生活喇。」細龜更加話如果佢呢位朋友接到job，又可以賺到使費：「咁咪好開心囉，仲可以周圍去玩，周圍去食。」不過朋友都係唔捨得香港，細龜就話：「捨得捨得，唔捨點會得呢！」

唔少網民都話聽完佢講覺得好吸引：「大把香港人現在移居廣東，好像活得更輕鬆了，整天吃吃喝喝玩玩樂樂。就算自己不捨得，也要對未來小孩規劃一下。」不過都有人認為佢淨係講正面嘅嘢，冇講到內地生活嘅壞處：「上海封城你不說？」、「其實現在內地物價指數也不低，尤其是大城市」、「太離地了，誰能保證一直有三厘利息。」

黃一山1995年同現任妻子杜婷婷結婚，同年誕下長子黃頌衡，2000年細仔黃頌匡出世，一家四口於內地生活。大仔頌衡8歲時被發現先天性腦白質發育不健全，身體機能衰退，不良於行，將來可能有機會失明。不過細龜冇放棄，反而更加努力工作養活一家四口，珍惜同大仔相處的日子。而細仔頌匡都好生性，3年前成功考入全球排名第10的倫敦大學學院（UCL），黃一山都為阿仔而驕傲。

圖片來源：微博

撰文：黃蘊姿