戴耀明「骨癌」見真情將與舊愛結婚 醫生做月老圓母「望子成家」心願

現年49歲嘅戴耀明早前上《360秒人生課堂》講做綠葉演員嘅辛酸，視帝好友譚俊彥仲幫佢圓夢，帶80歲嘅戴媽媽遊電視城，感動咗好多觀眾。眾所周知戴耀明係個孝順仔，為咗留港照顧母親，寧願唔去內地拍微電影做男一。今日（11日）戴耀明又再圓多媽媽一個心願，宣布成家立室！

同場加映： 姜濤後悔自爆「A0」要永遠成謎 入行後媽媽朋友突增 姜糖直呼奶奶

{{hket:ul-video id="5727"}}{{/hket:ul-video}}

戴耀明同分開多年嘅圈外前女友復合，更打算拉埋天窗。戴媽媽嘅願望好簡單，就係阿仔健健康康，最好有個家庭。戴耀明接受《晴報》訪問時表示媽媽見佢終於成家都好高興：「媽咪都好開心，因為佢成日都催我，媽咪都好熟悉佢（未婚妻），都識咗佢十幾年。」

{{hket:inline-image name="276015979_8059445660739580_6795281114176160811_n.jpg"}}{{/hket:inline-image}}

戴耀明表示同未婚妻嘅復合過程好戲劇化：「我隻手突起咗，隊咗一嚿出嚟，以為係cancer，走去化驗，但未有結果嘅時候就好驚，就同佢（未婚妻）分享，分享嘅時候就有一種患難見真情嘅感覺，所以有個共識，如果冇事就不如大家一齊行埋落去。咁就好戲劇化地，驗咗出嚟又冇咩嘢喎，好戲劇人生，V型反彈。我都諗住自己有嘢，點知出嚟又冇嘢喎！好似拍趣劇咁，好似本身係世界末日，又突然冇事咁。」

幸好原來只是受傷腫起，醫生謹慎斷症唔小心做咗月老，令到戴耀明同女朋友有結婚共識，不過未婚妻就因為有私人事處理暫時返咗內地，下個月先返嚟，二人共識會於今年年尾結婚：「諗住年尾，都未必會好大排筵席，想簡簡單單諗住自己少數人開開心心食個飯當係開party咁。」

女友細戴耀明8年，被問到會唔會打算生育下一代，佢就笑住答：「都要諗一諗，今晚即刻生，個細路哥十歲，我都六張，廿年後未大學畢業我都七張，呢個問題都戟戟哋，都要睇咩環境。」

戴耀明近年觀眾緣暴增，好多網民聽到呢個消息都好戥佢高興，紛紛留言恭喜！戴耀明好謙厚咁多謝所有觀眾對佢嘅祝賀：「感謝網民咁支持小弟，今年都好開心，觀眾都幾撐小弟，所以真係好感激。真係好老實講，何德何能，小弟又唔係靚仔大家都肯支持吓我，真係好感激。」

撰文：黃蘊姿

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】