旅發局聖誕跨年活動 橫掃5國際獎項

公關姊妹同黛安報喜，原來旅發局舉辦嘅「香港跨年倒數演唱會」及一系列聖誕及倒數活動，近期橫掃5個國際獎項！其中「香港跨年倒數」活動喺「Eventex Awards 2022」中勇奪「娛樂活動」組別嘅金獎及「現場表演」組別銀獎。同時喺亞太區權威廣告及營銷媒體《Campaign》主辦嘅「活動營銷大獎2022」中，榮獲「最佳戶外活動」銀獎。評審都形容活動充滿創意，同時喺公眾安全及防疫上採取足夠而有效措施，對舉辦其他大型活動帶來正面影響。

呢個跨年倒數活動有一眾人氣歌手出席，包括MIRROR、許廷鏗等，配合埋有煙火與激光效果嘅加強版「幻彩詠香江」和M+巨型倒數時鐘，吸引逾100個中港及海外傳媒直播或轉播，估計全球覆蓋人次超過24億。而「香港繽紛冬日巡禮」亦獲得「活動營銷大獎2022」嘅「最佳公眾活動」及「最佳活動製作」銅獎，真係可喜可賀。