陳柏宇（Jason）向來歌藝了得，出道16年的他曾參與大大小小超過30場音樂會演出，但原來至今每次上台前，仍然感到怯場，更因緊張而心跳加速。Jason坦言並非天生擅長表演，所以未能做到輕鬆自在，但強調這樣對演出未必是壞事。
同場加映：雙生陌生人︳馬德鐘望有分身幫手拍戲減壓 從不強求父子檔：等佢自己諗
陳柏宇繼早前的四台冠軍歌《有我》後，近日再推出新歌《墜落》，並邀得本地獨立rapper Novel Fergus合作，歌曲結合rock與hip hop元素，鼓勵樂迷放膽迎接世界和生活的突變。新歌MV為配合歌詞，選用暗黑的拍攝手法，Jason以第三身角色描述故事，更特別找來四名特技人，分別飾演學生、上班族及一般青年男女，眾人在大廈與大廈之間的天台來回穿梭，場面刺激又驚險。
有壓力會更謹慎
第五波疫情稍為放緩，Jason亦回復設有現場觀眾的演出。不少歌手期待跟觀眾見面互動，但他卻是例外，反而享受網上直播唱歌。Jason解釋︰「做直播少啲壓力，其實我喺台上表演長期有壓力，因為我唔係一個天生表演者，表演嗰陣始終唔能夠好自在，咁樣對我演唱一定有影響，但呢個影響未必係壞事，有時好緊張咁唱，又會再謹慎一啲。」
雖然有十多年舞台經驗，但Jason竟自爆每次未上到台，已經心跳加速，而且面對愈大舞台就愈大壓力。他直言︰「喺紅館開演唱會對住過萬觀眾，我係非常緊張，要唱四、五首歌後先開始定落嚟；但平時大部分演出都唔會有咁多首歌熱身，所以長期處於緊張狀態，仲經常因為太過緊張而唔記得拉褲鏈。」
想唱迪士尼英文兒歌
提到Jason女兒陳羿辰（Abigail）現已三歲多，甚有表演慾，問他可有計劃為囡囡推出兒歌？Jason直言暫無此打算，「我平時已經成日同佢唱兒歌，不過唱兒歌都唔錯，可以賺好多錢，但一定要係英文歌。如果可以唱到一首迪士尼主題曲就夠喇，即刻發達！」
化粧︰Frances Ho/jessica chan team
髮型︰The Attic@AlexSo & Aki
服裝︰FOOTLOOSE TYCOON, Ohio, Levi's
撰文︰倪小珊 攝影︰林良明