陳淑蘭
陳淑蘭

今生種下善良種子

發佈時間: 2022/05/19

今生種下善良種子

你信唔信有前世今生?我好希望有。因為若有緣無份,下世會否再續前緣,有情人終成眷屬。又或者喺前世對你做咗惡事,今世可以畀機會我去補償。傳統儒家思想以「未知生焉知死」嘅態度,說明人要思考存在價值同意義,鼓勵人積極入世,把握當下,將生命嘅廣度無限擴大。人生本身就係一種修行,修前世嘅因,今生嘅果。前世今生中每次輪迴就係為咗學習同成長,當你修足學分,靈性就可以更上一層樓。

自古以來,人一直想知道死之後會點樣。死亡係存在嘅結束、進入永恒嘅開端?抑或係世上唔同生命嘅一個轉折點?有人話靈魂會以唔同形體轉世,大約25%嘅美國人相信呢個講法。點解有咁多人,包括我在內,會被輪迴轉世呢個講法吸引呢?

我睇咗《前世今生來生緣》呢本書,作者布萊恩‧魏斯係常春藤名校耶魯大學同哥倫比亞大學嘅畢業生,接受正規訓練嘅醫生,係權威心理醫學教授、無神論者。佢通過催眠帶病人進入前世境界,醫治咗好多病例。佢亦認為喺朝向永生不朽演進嘅過程中,今生所作所為都會影響到來世。佢倡導呢個重要嘅認知觀點,唔只因為佢令病人回溯前世,更重要嘅係,佢哋亦進入咗未來。

書中呈現眾多真實個案療癒結果,話我哋知我哋當下嘅選擇,將如何影響未來嘅際遇,證實探索前世與來世係一項珍貴嘅學習,並且能夠減輕或療癒今生所受到嘅身體同心靈上嘅創傷。我特別喜歡佢前言嘅一句話:喺今生累積一個更完美嘅未來,種落善良嘅種子,就會長出更好嘅莊稼;如果你做善事做好人,將來就會有好報應。我鍾意呢個公平嘅公式!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭