人間飄浮︳黃劍文一步之念 險隨母親做傻事 學懂珍惜：愛真係要講出口

現年38歲的歌手黃劍文（Kimman），擁有一段不平凡的成長故事，小時候母親改嫁要跟隨後父生活，在親戚面前只准叫媽媽做阿姨，他同後父關係麻麻。26歲那年更發生噩耗，母親選擇以燒炭結束生命，令黃劍文墜進人生谷底，認為是後父害死了母親，哭了三日三夜又失眠，感到人生再沒有事情留戀，只要行多一步就從26樓的露台跳下去，幸好一念之間想起至親，放棄步母親後塵做出傻事；之後他到台灣參加唱歌比賽，又到澳洲展開遊歷生活，結果憑音樂展開光明大路，在娛樂圈闖出名堂。

{{hket:ul-video id="5897"}}{{/hket:ul-video}}

{{hket:inline-image name="06022001.jpg"}}{{/hket:inline-image}}

{{hket:inline-image name="20220531114715.jpeg"}}{{/hket:inline-image}}

黃劍文曾以街頭歌手身分，在世界各地不同地方獻唱，2016年獲邀為ViuTV唱《瑪嘉烈與大衛系列 綠豆》主題曲《我們的》及插曲《尋找消失的過去》，當中插曲是周慧敏作曲的，後來2020年又參加《全民造星III》，令其人氣急升。其實他早於2007年已開始參加唱歌比賽，前後已有13年這方面經驗，他說：「嗰時屋企不時會嗌大交，甚至我會報警叫警察嚟平息屋企糾紛，嗰次最大嘅推動力，係覺得打份工都唔能夠照顧到屋企人。我以前係做倉務員、做超市，屋企嗰時係幾窮，心諗飛去台灣試吓做音樂，參加唱歌比賽等人識，由2007年到2020年都係參加比賽，第一個比賽係台灣嘅《超級偶像》，返香港之後就有《超級巨聲》、《快樂男聲》、《中國好聲音》、《星光大道》同《全民造星III》，全部都係為咗想賺多啲錢畀屋企。」

《全民造星III》黑馬Ben贏得冠軍網友狂鬧造馬 Cloud倒灶三甲不入被勸入星夢【下一頁】

提到他的家庭背景，黃媽媽十幾歲成為母親，後來帶同兒子改嫁他人，「我細個無見過親生阿爸，阿媽再結婚後我有個後父，細個最難過係去後父嘅親戚嗰邊，我唔可以叫我阿媽做阿媽，要叫佢做阿姨，覺得呢個幾大影響我嘅成長。我曾經憎我後父憎到想殺佢，喺14歲嗰年接觸咗宗教，憑信仰由憎恨變成去學習點樣去愛，可能連我阿媽都憎埋一份，但我覺得阿媽人生係好慘，佢十幾歲就生我，佢想咩？（媽媽後來自殺？）阿媽喺我26歲時離開，其實佢之前自殺過但唔成功，可能一直抑壓住，冇人同佢傾偈抒發內心痛苦，好多時佢飲醉酒就控制唔到自己，亂講嘢同喊。當日我係承受唔到媽媽離開嗰種痛苦，因為佢係燒炭（自殺），喺醫院張床聞到好大陣燒炭味，之後三日三夜我喊到瞓唔到覺，呢件事令我對世上所有嘢唔留戀，覺得生存喺度做咩？第四日去咗朋友屋企住，喺灣仔一個26樓嘅單位，我一起身就行出露台，行出去就望落去，望落去就好想跳落去…。」

《全民造星III》Cloud票數領先開場盡見大將之風 Alina性感高難度舞步搶晒鏡【下一頁】

至於這一步之念如何抉擇？黃劍文眼紅紅表示：「如果我行多一步？行多一步就跳咗落去，就好似我阿媽一樣，感到好孤單、好孤獨，其實死係好容易，但我想跳時突然諗起屋企人，諗起由細到大湊大我嘅公公婆婆，如果佢個女已經咁樣自殺離開，佢哋湊大嘅孫又咁樣離開，我覺得我係好自私，當時亦都諗到細佬細妹，如果我咁樣做，佢哋會唔會跟住咁做呢？於是決定留番低，之後我做嘅第一件事，就係叫神救我。」最終他憑信仰走出陰霾，踏上他的音樂之路。

{{hket:inline-image name="2013KW1027WENCESLASSQUARE.jpg"}}{{/hket:inline-image}}

{{hket:inline-image name="2014KW1118LONDON.jpg"}}{{/hket:inline-image}}

黃劍文最新派台歌叫《人間飄浮》，看來很貼切他的人生。他笑說：「我嘅人生係飄浮，因為媽媽件事影響到我連返屋企都唔敢返，之後去咗台灣參加比賽，比完賽就去澳洲Working Holiday，當時有諗住放棄唱歌，點知去到澳洲見到街頭音樂文化咁強烈，令我有年半時間喺澳洲唱歌，嗰時每日唱2、3個鐘就搵到一日嘅收入，大概有800至千幾元港幣。接住嗰4年我不斷飄浮遊走歐洲、亞洲唔同地方，都係街頭去唱，反而令我搵到唱歌係我真正使命，帶一啲歡樂或者安慰畀其他人。因為喺街唱歌聽到好多聲音，好多人會講『You make my day』，甚至有啲人喊住多謝我又走嚟攬我，原來我音樂嘅Power咁厲害。」

（↓點擊放大睇圖片↓）

來自破碎家庭的黃劍文，承認很怕將這些經歷帶到將來的家庭，令他很擔心日後會有小朋友，「我怕畀唔到任何好嘅嘢或幸福畀佢哋，但如果真係有嘅時候，都會盡我最大努力，去畀最好嘅嘢佢哋，因為唔應該令佢哋受傷。（幸好當日冇做傻事？）如果我26歲嗰年真係死咗，我就唔可以同大家講，愛真係要講出口，如果有一啲嘢真係唔開心或者心入面有啲情況出現，你係要同屋企人講，係有時會驚講咗會更大壓力，但真係唔好收埋，可能會更加令自己更沉重，有啲嘢會解唔開。我好感恩曾經有呢個機會，喺諗得通時候講咗『阿媽，我愛你，多謝你咁多年嚟辛苦養我哋。』仲有記得擁抱，擁抱時候可以聽到從未聽過嘅嘢，我30歲嗰年第一次擁抱我婆婆，婆婆就同我講句乖孫，呢個係令我覺得好感動。我真係失去過，所以更加學會珍惜。」

編輯：梁榮達

攝影：馮凱宜、何家賢

化妝/髮型：小籠包

服裝：Rule_Crossing Man

場地：Liffee Coffee & Treats（灣仔堅彌地街1A號地下A舖）

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】