【聲明】港生活網站並無進行電話推廣活動

8月移民美國前演出告別作 黃夏蕙性感大露背回饋粉絲

發佈時間: 2022/06/13

黃夏蕙(夏蕙BB)日前在社交網宣布將於今年八月移民,網民紛紛感嘆日後看不到她扮鬼扮馬上頭炷香。昨日,夏蕙BB和經理人Simon會見傳媒,她透露將與老公潘炳烈移民美國,並在離港前參演自家網劇;她預告將激罕性感上陣,以回饋粉絲多年來的支持。

年屆91歲的黃夏蕙向來關心社會,經常開腔為市民抱不平,有「正義女神」之稱。每年農曆新年,夏蕙BB都會到黃大仙祠上頭炷香,更會因應該年生肖悉心打扮,但隨着她八月移民,「夏蕙BB搶頭炷香」將成絕響。夏蕙BB日前在社交網宣布:「八月我要走啦!我唔知幾時可以再喺香港同大家見面!」其實,夏蕙BB早已榮升太婆四代同堂,據知她一年前已計劃跟老公潘炳烈移民到美國三藩市,與孻女一同生活,安享晚年。

夏蕙BB昨日聯同經理人Simon跟傳媒見面,她坦言不捨得離開,並決定在離港前參演Good Show TV自家網劇《美麗愛情故事》。Simon表示︰「係一部女同志劇,下星期就開工,佢仲有大膽鏡頭。」夏蕙BB一臉愕然︰「下,點樣性感呀?」Simon透露劇中會有一名後生女愛上夏蕙BB,並說︰「會有沖涼鏡頭,仲有人摸佢。」由於是告別作,夏蕙BB決定豁出去︰「無所謂呀,我沖得,(露)背脊無所謂,第二個部位就唔出得街。」

不用替身親自上陣

問夏蕙BB可接受背部全裸?她即說︰「得,無所謂!唔使替身,梗係自己拍啦。(再大膽啲?)點大膽呀,要令人睇落順眼先得㗎,都幾廿歲仲點大膽。獻醜不如藏拙,你諗下90歲人,畀咩人睇呀?如果畀得人睇我都畀。」夏蕙BB不擔心老公介意,「佢唔會理我拍戲,但我唔可以亂嚟,自己有分寸㗎嘛。」對於網民不捨她每年以生肖造型上頭炷香,她笑說:「如果可以,我睇下(到時)可唔可以飛番嚟幾日,時間唔容許就喺美國拍條片畀大家睇。」

撰文︰倪小珊

美術︰梁政敏

8月移民美國前演出告別作 黃夏蕙性感大露背回饋粉絲

夏蕙BB和老公潘炳烈將移民三藩市跟孻女團聚。(資料圖片)

8月移民美國前演出告別作 黃夏蕙性感大露背回饋粉絲

去年初,夏蕙BB花數萬元,化身牛魔王到黃大仙祠上香祈福。(資料圖片)

8月移民美國前演出告別作 黃夏蕙性感大露背回饋粉絲

07年,夏蕙BB(右)化身學生妹,與紮起孖辮扮Lolita的余慕蓮現身遊戲展。(資料圖片)