【聲明】港生活網站並無進行電話推廣活動

音樂劇「鬧爆」隔離生活 梁祖堯搵陳凱詠趙學而鬥毒舌

發佈時間: 2022/06/14

梁祖堯(阿祖)、湯駿業(Ahdee)及邵美君成立的風車草劇團,今年有多個演出計劃因第五波疫情煞停。眼見近日疫情回穩,三人決定捲土重來,聯同歌手陳凱詠(Jace)及趙學而合演21場音樂劇《隔離童話集》,以超現實方式描述平凡人被隔離的故事。阿祖預告五位演員屆時在台上要盡情鬧人,「鬧交鬧得最甘嗰場,會係學而同Jace!」兩位美女歌手即將變身潑婦。

梁祖堯、湯駿業及邵美君成立劇團19年,一直合作無間,最新音樂劇《隔離童話集》將於八月假葵青劇院演出,門票日前公售,短短一日全部售罄,但阿祖堅稱場地所限不會加場。今次風車草劇團三位靈魂人物,配搭兩代歌手趙學而、陳凱詠,叫座力果然不容小覷。《隔》劇顧名思義是有關隔離的故事,原來該劇的誕生原因亦與這場世紀疫症有關,阿祖說︰「我二月中過招,好彩輕症完全無病徵,喺屋企隔離期間完成劇本大綱。」

學而讚阿祖似「林玉露」

音樂劇中,阿祖、邵美君及Ahdee分別扮演咖啡師、家庭主婦及兒童節目主持,三個角色的人生如同地底泥,一覺醒來更忽然被掟入隔離營,與負責照顧他們的學而及Jace大爆火花。提到五位主角演出時皆要發揮尖酸刻薄的本色,而阿祖在ViuTV節目《晚吹-空肚講宵夜》的毒舌形象深入民心,他笑說:「我喺街上遇過有女士叫我鬧佢『八婆』!其實毒舌只係節目效果,不過咁多年嚟面對身邊嘅蠢人及心地差嘅人,都會令自己變得毒舌。」學而亦大讚阿祖夠mean:「阿祖把口就好似我以前演《皆大歡喜》個角色『林玉露』一樣。」

提到找來學而合作,原來阿祖睇中對方形象硬朗:「我睇完韓劇《少年法庭》,覺得學而形象好似劇中法官金憓秀,都係硬朗又冷酷無情,所以即刻搵佢。」學而繼07年《一期一會》及08年《心太野》後,相隔多年再演音樂劇,她獲阿祖邀約時一口答應,「近年我都好少拍劇,又無乜群體演出,主要做自資工作,今次可以同當紮歌手同演員合作,老人家都要行出嚟玩下。」

邵美君幫囝囝見女神Jace

至於歌手出身的Jace首度演音樂劇,全因她與Ahdee合作ViuTV帶貨節目而結緣。Ahdee對這位樂壇新貴讚不絕口:「Jace除咗唱歌跳舞叻,原來思辨能力都高,可以唔止賣可愛,仲發掘到其他才能。」零舞台劇經驗的Jace面對四位前輩,坦言緊張萬分,「以前唔知點樣先入行做舞台劇,所以今次參與演出,係上天畀我嘅禮物。我開兩場演唱會已經好緊張,今次仲要有21場,依家要調理好身體,準備圍讀同綵排。」

至於邵美君表示十分期待跟眾人合作,除了能聽到學而的歌聲外,又能認識13歲兒子的女神Jace。她說:「我住喺山窿好耐,唔知依家興乜。阿仔介紹Jace嘅歌畀我,讚佢唱歌好聽、好有型,仲係佢嘅女神,所以好期待同Jace合作。阿祖提議老友帶囝囝睇排戲,邵美君說︰「雖然囝囝啱啱拍拖,睇佢遲啲口味有無變,不過我都會帶佢同Jace食飯!」此外,在《隔離童話集》海報中,五位演員化身森林內不同動物的精靈,以動物代表城市裏各式各樣的人。導演之一的Ahdee表示︰「其實五個人唔係經歷緊現實嗰種隔離,而係有一種魔幻嘅感覺,所以劇名用『童話』兩個字。」

服裝︰Brunello Cucinelli、COS、Mr P.@MR PORTER(梁祖堯)、COS(邵美君)、Rickyy Wong Studio(陳凱詠)、ARTO.(趙學而)、Brunello Cucinelli, HOMME PLISSÉ ISSEY MIYAKE(湯駿業)

化粧︰Deep Choi@deepmakeup & Shirley Mak

髮型︰Jo Lam、Jaden R & Kenki@Salon Trinity

場地︰Finest Design Nest

撰文︰Steven

美術︰梁政敏

攝影︰林良明

音樂劇「鬧爆」隔離生活 梁祖堯搵陳凱詠趙學而鬥毒舌

身兼音樂劇導演、編劇及演員的阿祖,早前與學而及Jace登上《爆谷一周》宣傳。(IG圖片)

音樂劇「鬧爆」隔離生活 梁祖堯搵陳凱詠趙學而鬥毒舌

五位演員在宣傳海報的造型各具仙氣,充滿魔幻感覺。

音樂劇「鬧爆」隔離生活 梁祖堯搵陳凱詠趙學而鬥毒舌

阿祖(右)將自己在《空肚講宵夜》中的毒舌賤格形象,投入在音樂劇中。

音樂劇「鬧爆」隔離生活 梁祖堯搵陳凱詠趙學而鬥毒舌

零舞台劇經驗的陳凱詠首度演音樂劇,笑言靠幾位大師級拍檔指點迷津。