高志森與餅印細女長年分隔異地 踩倫敦落後張堅庭暗諷「農民」

導演高志森早前前往英國，出席女兒喺倫敦舉行嘅婚禮。行程中佢記錄低所見所聞，喺網上直播、同社交平台都講到「感覺倫敦嘅地鐵落後」，言論引嚟同樣係導演嘅張堅庭暗諷佢見識少，一地都係花生殼。

同場加映：區永權感恩司儀工作贏得信任認同 公開自閉兒經歷望鼓勵同路人

{{hket:ul-video id="6010"}}{{/hket:ul-video}}

高志森出帖，包括同囡囡嘅合照，感性留言：「我與小女兒長期活在地球的兩端，相聚時間不多，佢嘅成長我不常在身邊，我同佢最難得嘅連繫，就係我導演佢作嘅曲，父女就在作品中相會，這是我不會放棄的事情。」相中高志森細女身穿旗袍，未知係咪就係細女出閣？唔少人好言相向，留言恭喜佢做外父，又大讚阿女同佢非常似樣，遺傳到佢嘅藝術細胞，令人羨慕。

{{hket:inline-image name="279516388_10158726069841451_504395345054684113_n.jpg"}}{{/hket:inline-image}}

高志森又喺直播同社交平台中分享佢喺倫敦嘅見聞，批評倫敦地鐵喺駛經地底，手機冇訊號，十分落後：「今日咩世代呀？十年前無訊號都適應到呀！今日你話地鐵下面無手機訊號，真係接受唔到囉，咁奇怪嘅。」又認為，如果某啲人「欣賞地鐵內冇訊號」應該發動地鐵禁言︰「講嘢都唔好講，如果咁鍾意寧靜。」佢指喺地鐵發現唔少乞兒，並且「幾好搵」：「我三程車就有一程，見到有乞衣喺車廂裏面赤腳，問人攞錢。」

高志森今次先飛土耳其再轉飛英國，因為怕「溶斷」機制隨時冇飛機去英國。佢表示英國表面與新冠共存，但實地視察後發現多處均發出廣播，呼籲市民注意及防疫。高志森更痛斥英國人防疫鬆懈，在地鐵內幾乎唔戴口罩：「喺兩卡車地鐵，你數到戴口罩嘅人呢，係兩個起三個止，我係其中一個。」

高志森認為英國都有值得欣賞嘅地方，表示自己睇咗《少年PI奇幻漂流》舞台劇版，有所啟發。

高志森言論引嚟張堅庭注意，後者又以iPhone作比喻，綽綽有餘，出post隔空寸高志森見識少：「好多人笑倫敦地鐵落後，同新建地鐵城市的確係差大截，不過其他國家用牛用馬當交通工具時，倫敦人已經坐地鐵了（1863年行駛159年歷史）夏天某時段真係熱，而且Central Line特別嘈因為彎路多。伊利沙伯線則和香港一樣，似乎仲舒服啲，但網線仍未完全開通，做嘢慢板。倫敦有272地鐵站，未計女王線的41個站，咪隨便話倫敦地鐵落後，有個農民初用iPhone 14面有驕容，話你部iPhone 1好落後，真係唔知點回應，惟有承認：對，iPhone 14係比 iPhone 1（2007出機）先進。」認真言簡意賅呀！

撰文︰娛樂組。