【聲明】港生活網站並無進行電話推廣活動

媽媽留下的金石良言

發佈時間: 2022/06/30

呢段時間透過執媽咪嘅遺物,同佢保持相連感。好多物件都帶住回憶而唔捨得掉棄。

雖然媽咪讀書唔多,原來佢keep住不停學習,除咗將好多《聖經》金句抄喺記事簿,亦搵到一張張唔同顏色嘅金石良言posters。以前媽咪好鍾意買嚟抄寫,亦會大聲朗讀畀我聽。當時我聽到呢啲金石良言,通常係右耳入左耳出,但今時今日嘅我,再睇番呢啲金石良言卷紙,除咗有媽咪嘅回憶,字裏行間開始感受到人生嘅教導。

呢批卷紙來自福靈出版社,作者郭福靈,我相信當時應該係作者自資印刷,既然今日有緣畀我搵番,就抽樣同大家分享下。

金石良言卷紙每一幅都有唔同主題同好靚嘅底色。主題有︰「人生如夢」、「往事如煙」、「治家格言」、「禍從口出」、「處世金言」、「萬惡淫為首」及「難忘母愛」。我就從「難忘母愛」呢一卷揀選一啲良言同大家分享下,唔知你可否感受到字字珠璣呢?

慈母一片真心話,等如夜裏的明燈,沒有明燈來指引,真是不知怎樣行。今日雖生人世上,未知前路那條真,感謝娘親的教導,使我明白點做人。萬語千言想我好,充分表現愛兒心,望求媽媽莫顧慮,應要愛惜你精神。一碗參湯來奉上,敬來給你補下身,從今以後守本份,決心走去做好人。用心學習尋上進,把握時機愛光陰,往日嫖賭吹蕩飲,件件拋去海中心。痛改前非不懶惰,苦海不再去浮沉……願你常常有快樂,你兒就會有開心。不負娘親的厚望,立志平步到青雲。他日名聲傳遠近,耀祖光宗處處聞。萬人空巷看熱鬧,那時就是我來臨。

媽咪,雖然你已經唔喺我身邊,但你嘅母愛永在,令我難忘。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭