【聲明】港生活網站並無進行電話推廣活動

離巢無綫工作不斷 敖嘉年開拓事業新境界

發佈時間: 2022/06/30

早年贏得無綫台慶頒獎禮「飛躍進步男藝員」的敖嘉年,效力無綫24年間演活不少「奸仔」角色;他前年離開娘家後即成功轉型,穿梭不同平台拍攝綜藝節目、劇集及舞台劇,甚至開班教演戲,可謂「百足咁多爪」。嘉年感恩在「疫境」下仍能多方面嘗試,更有望轉戰幕後做節目監製,「嚟緊有好多projects,內地同外國嘅都有,疫情緩和就會開工!」絕對是離巢無綫藝人的成功例子。

敖嘉年與梁嘉琪主持的香港開電視節目《嘉嘉醫療自助班》正熱播,兩位主持訪問26位不同專科醫生,探討各種健康問題,嘉年笑言乘機自肥,私下向醫生請教。現年45歲的嘉年,將大部分青春投資在TVB,由90年代主持《城市追擊》開始,到近年成為劇集「御用奸仔」,最突出的角色包括《巾幗梟雄》蔣必文、《鐵拳英雄》金耀龍等。嘉年認為,金牌監製李添勝是其演藝生涯最重要的伯樂,「咁多年嚟拍過好多添哥監製嘅劇,好多角色都戲份重,即使曾經有幕後人同佢講話我唔得,佢都堅持用我畀足信心,之後拍《巾》劇攞到獎都係一個肯定,好緊要。」

擔任戲劇導師

另一位無綫監製文偉鴻,亦對嘉年影響深遠,他說:「佢開劇經常搵我做又奸又衰嘅角色,反應都好好,16年佢執導《使徒行者》電影版都搵我配音;之後《城寨英雄》大奸角馮春美本來都搵我演,不過當時要去英國同內地拍《葉問4:完結篇》,撞咗時間。」前年毅然離巢無綫,是否覺得多年來欠缺運氣?嘉年說:「我都係盡力做,去到乜嘢位置好難控制,外界講到我點差都好,自己又無呢個感覺。」事實上,他離巢後從未停步,除了即將推出新歌,更初執教鞭,為演藝課程擔任戲劇導師,「好多謝高志森搵我開班教成年人,佢想發掘下新演員,訓練班仲有ViuTV嘅演員。我都驚應付唔到,但做導師自己又可以溫故知新,同學生交流嗰陣,會記得唔同嘅演戲方法。」

教戲以外,嘉年透露將進軍幕後,開拓內地市場。「19年內地有project搵我做監製,後嚟因為疫情無得北上,所以計劃要煞停,相信通關後會再搞,依家留喺香港做唔同工作。(做節目監製)係我未來嘅重心,因為可以多啲自己想法。」他指內地戲劇市道興旺,又透露原本為兩部網大(網絡大電影)做男主角,但因隔離檢疫時間長,難以內地香港兩邊走,最終錯過機會。不過,他仍十分憧憬內地發展,「內地網大風氣好勁,又製作好多七至13集嘅劇集,依家都係睇情況,如果隔離檢疫時間縮短就會北上。」他指除了內地的工作計劃,他亦有其他外國project,相信他在通關後有排忙。

讚蔣家旻聰明肯學

目前留港工作的嘉年,依然密密做無停手,除了剛完成ViuTV劇集《野人老師》,跟MIRROR成員邱士縉(Stanley)及陳瑞輝(Frankie)合作;又即將回另一娘家香港電台開咪主持節目,自由身的他依然工作不斷。感情方面,嘉年今年二月忽然與劇集《欺詐劇團》拍檔蔣家旻傳緋聞,惹來偷食疑雲的嘉年立即澄清自己已離婚三年。提到這位緋聞女友,嘉年表示彼此只是間中有聯絡,他大讚女方:「佢係一個好聰明、好肯學嘅女仔。」談到TVB花旦競爭大,嘉年說:「佢一向都肯交流,我會鼓勵佢繼續努力,演戲方面,我都會畀到意見佢。」

化粧︰Rigel Ng@ Rigel's Beauty Arts

髮型︰Philip Lee@HAiR

服裝︰Bespoked Ian Chang

場地︰The AIR(The ONE)

撰文︰Steven

美術︰梁政敏

攝影︰林良明

離巢無綫工作不斷 敖嘉年開拓事業新境界

嘉年為ViuTV拍《野人老師》,不少台前幕後也是無綫舊同事。(IG圖片)

離巢無綫工作不斷 敖嘉年開拓事業新境界

蔣家旻與嘉年的年紀相差13年,但外形合襯。(資料圖片)

離巢無綫工作不斷 敖嘉年開拓事業新境界

嘉年(左)化身導師教演戲,嘗試人生第一次。(IG圖片)

離巢無綫工作不斷 敖嘉年開拓事業新境界

09年,敖嘉年憑《巾幗梟雄》贏得「飛躍進步男藝員」,成就事業高峰。(資料圖片)

離巢無綫工作不斷 敖嘉年開拓事業新境界

嘉年與梁嘉琪相識十多年,卻首度拍檔做主持。(網上截圖)