7-Eleven星洲首家海灘便利店 歎Tiger啤

好想去旅行嘅黛安聽聞，新加坡嘅7-Eleven喺當地著名地標之一嘅聖淘沙巴拉望海灘，開設咗首家海灘便利店！店舖外牆有獨特壁畫同塗鴉藝術，而店內除咗有港人熟悉嘅思樂冰、Mr. Softee同7CAFÉ外，仲同啤酒品牌Tiger Beer合作，設置Reverse Tap自動售酒機，顧客只需簡單輕按按鈕，即可自動加滿一杯冰爽清涼嘅Tiger啤酒。

新店仲推出獨家氮氣飲品系列，提供清爽紅茶同其他不含咖啡因嘅水果茶口味氮氣飲品，仲將北極可樂機帶到海灘，顧客只需買一枝可樂，並將可樂放喺急凍結冰機上按掣，隨即可歎到一支冰鎮可樂。

公關姊妹話，便利店內仲有熱食櫃枱，出售香脆炸雞、可可榛子牛角包和番茄芝士餡餅等。黛安都好想搵機會去感受下海灘7-Eleven嘅美食同嶄新購物體驗啊。