【聲明】港生活網站並無進行電話推廣活動

享受做網紅囡囡司機 李璨琛笑Lucy鍾意壞男孩

發佈時間: 2022/07/05

李璨琛(Sam)和許靖韻(Angela)在香港開電視播放的劇集《黑金風暴》中飾演夫婦,劇中二人為了生育問題而產生矛盾。現實生活中,Sam和太太梁志瑩育有四歲女兒李元元(Lucy),身為網絡紅人的Lucy,年紀小小已經接下不少廣告,為自己賺取學費,星爸Sam則紆尊降貴擔任囡囡的私人司機,開心任由女兒指使。

李璨琛和許靖韻在《黑》劇中首次合作,飾演一對關係疏離的夫妻,即使拍攝最親密的床戲,也沒有身體接觸。Sam笑言︰「我哋係各自各瞓覺,掂唔到大家,我係擰歪面滿懷心事,佢就瞓喺度猜疑我。」Angela透露劇中Sam因與女同事互傳短訊而令她起疑,問她在現實中會否check另一半的電話?她笑說︰「我唔會刻意去check,見到就係天意。」Angela又笑言被昔日Sam的演出形象嚇壞,以為對方「好猙獰」,但經過今次合作,她對Sam已另眼相看:「第一次拍劇有好多對白,全靠佢不停同我對戲,同埋佢拍攝時好chill。」

Lucy最愛MC張天賦

至於女兒李元元可有check爸爸電話?Sam笑言︰「個女就算睇,都只會睇MC(張天賦),點會睇我吖?佢日日聽《記憶棉》,日日係咁唱,不過返咗學就好啲,少啲對住電視,可以同同學仔見面。(呷醋?)梗係唔會啦,佢咁難得鍾意一個咁好嘅歌手,我都覺得MC啲歌OK呀!」Sam更大爆Lucy要求跟MC的人形紙板一起睡覺,他說︰「個女話『爸爸,幫我將紙板人搬入房,我要對住佢瞓』,真係攞你命!如是者叫咗幾日,我都不為所動,我話日日望住你瞓唔係幾好,不如擺喺廳啦!」

身旁的Angela表示自己是Lucy的粉絲,揚言要送Lucy一個MC的攬枕,Sam聞言立即反對︰「唔好喇啩!攬住個男仔瞓,你叫我做老竇嘅情何以堪?」Sam笑指Lucy喜歡壞男孩︰「個女話坐校車時,有個男仔都係姓李,話佢好曳會踢前面個位,我心諗『衰女,鍾意啲曳男仔』,哈哈!」

許靖韻自認粉絲

Lucy貴為目前最紅的星二代KOL,但Sam指她不知道自己有大批粉絲。Sam說:「佢以為(粉絲)係爸爸媽媽嘅朋友,有時出街見到好多人同佢say hello,佢都好乖,見到人會打招呼,但如果粉絲太熱情,佢就會怕醜。」Sam早前父女檔合作接拍廣告,他笑言是很好的活動教學。提到Lucy成為廣告寵兒,又跟偶像MC合作,Sam笑說:「我依家做佢司機,叫我做司機阿琛,老婆就係佢經理人。不過車個女出去做嘢都幾開心,又可以打牙骹,都幾享受。」

許靖韻

化粧︰Sakura Chow

髮型︰Veron Chan @Saloon-Festival Walk

服裝︰i.t_too #STYLENANDA

撰文︰倪小珊

美術︰梁政敏

攝影︰林良明

享受做網紅囡囡司機 李璨琛笑Lucy鍾意壞男孩

「賦二代」Lucy對偶像MC張天賦的人形紙板愛不釋手。(IG圖片)

享受做網紅囡囡司機 李璨琛笑Lucy鍾意壞男孩

Sam和Angela在劇中為生育問題發生爭拗。

享受做網紅囡囡司機 李璨琛笑Lucy鍾意壞男孩

Sam與太太分別擔任女兒的司機及經理人。(IG圖片)

享受做網紅囡囡司機 李璨琛笑Lucy鍾意壞男孩

Angela自言經常看Lucy的IG,大讚小妹妹十分可愛。