由電影主角變電視配角 何啟南：千祈唔好放棄自己

在處境劇《愛‧回家之開心速遞》飾演律師John的何啟南，過往經常在正劇演奸詐配角。其實17歲時被星探發掘入行的他，一出道便做電影男主角，更獲提名金像獎，可惜年少的他受性格所累而漸失機會；直至96年加入無綫後，由主角變成「行行企企」的角色，令他一度深感無癮，方發覺自己根本「未夠料」。

何啟南1986年拍攝首部電影《青春怒潮》，同年在電影《操行零分》演男主角「何大力」，獲提名《第六屆香港電影金像獎》最佳新演員。出道時星途不俗，可惜他年少氣盛「唔聽人講」：「（當時）以為自己好掂，點知好快就無乜人搵我，我真係唔知點解。係我個樣有問題？得罪咗人自己唔知？（可能係）性格造成，我以前唔聽人講、衝動…例如以前有人搵我，我話『我走喇，我唔拍，唔做喇，我想試幕後』。」於是，他在英國修讀兩年電影製作文憑課程，想過當副導演的他，發現自己未能勝任；擔任電影製片卻因要管錢而放棄，最終再次走到幕前。

憑《愛‧回家》成功入屋

簽約無綫後，由電影主角「跌落凡間」變閒角，何啟南直言︰「（當時心情）係好唔舒服㗎，點解會咁嘅？問自己都無用，都答唔到自己，一直做落去先至發覺自己未夠料，學下嘢先啦！」他曾經灰心，坦言「做到好無癮」，「又係做呢啲嘢，又係做奸角，可能公司覺得我做到七情上面。我都會驚定型，但無辦法，我又唔會去敲門叫人哋畀我做好人。放棄自己咪仲衰，無意思㗎喎，千祈唔好放棄自己，總之仲可以做，咪做囉，我希望撞到好角色、劇本，可能呢世都撞唔到，但你唔試就一定撞唔到，我諗每個演員都係喺度等。」

專演奸人的何啟南，在《愛‧回家》飾演律師John一角，成為他「入屋」的契機。他笑說：「我喺《愛‧回家》對Helen（姚瑩瑩飾）好情深，但中間又有個細龍太（陳偉琪飾）出嚟喎，咁觀眾就會想睇我究竟係好男人定係渣男。佢哋想睇我幾時衰，因為劇情講我成日同細龍太去長島酒店，想知幾時穿煲，不過最尾都無穿。後來（劇情）寫寫下又寫咗去第二度，我條愛情綫無咗，但又去咗同白彪嗰條綫。John算係一個好角色，我都做咗四年，但未去到好鍾意。」

難捨家庭暫拒北上

與其在無綫等待機會，何不選擇向外闖？他說：「我有諗過，係王維基（HKTV掀挖角潮）嗰陣，但我發覺兩邊無乜分別，嗰邊（HKTV）都係呢邊（TVB）啲人，所以我最後無走，咁我喺出面都有啲嘢拍。」至於北上發展，他曾跟太太商量，但因起碼要離港半年，他實在捨不得家庭而暫拒。他笑言婚姻對他影響甚大：「我個人定咗，靜過以前，以前鍾意周圍走，覺得屋企好似有鬼咁，依家就鍾意留喺屋企。」對於未來，他希望影視圈能百花齊放︰「希望香港多幾個電台、電視台，依家個個都講緊大灣區，希望多番啲製作同電影，好似以前咁，大家都有好多工作。」

【一掃睇片】

撰文：黃曉妍

攝影：王華婷、林君茹

美術：顏玉玲