【聲明】港生活網站並無進行電話推廣活動

為韋家輝《神探大戰》搏盡 劉青雲拍激流戲險喪命

發佈時間: 2022/07/15

劉青雲與韋家輝30年前合作的神劇《大時代》為電視圈經典,二人投身影壇後,依然是最佳拍檔。由韋家輝執導、青雲主演的懸疑片《神探大戰》下周四在港上映,他們結伴受訪分享拍攝感受,青雲瞓身演出動作場面,在內地拍激流戲更搵命搏,「好彩全程吊住威也,否則沖走咗真係無人救到我。」

劉青雲在《神探大戰》中演繹患精神病的過氣神探李俊,擁有正邪難辨的多重人格。韋家輝對青雲的表現非常滿意︰「如果其他演員演呢個角色,就比較嘥時間,呢啲嘢無得呃,埋位就知個演員得唔得,如果拍攝嗰陣仲要教主角做戲好麻煩!」提到在戲中展現影帝風範,青雲稱︰「我覺得編劇創作角色好難,自己只係講個角色出嚟,簡單啲。(已是神級演技難以自我突破?)唔係神級,每次拍一齣戲都重新開始,重新去學,自己先決定咗點演,然後再去睇劇本。」戲中尚有林峯、蔡卓妍及何珮瑜等影圈後浪,韋家輝讚揚一班演員十分盡力,對他們另眼相看,「拍攝埋位時感覺到佢哋好有心、好搏命,好多動作場面都親身上陣。」青雲贊同說:「雖然我哋群戲唔多,見親佢哋都係開槍,但係睇得出佢哋都好有energy!」

韋家輝難忘廟街外景

現年58歲的青雲,在戲中有大量追逐及槍戰場面,更有跳渠、跳海戲,他自言體力上仍能應付,「今次唔算太辛苦,不過都有跳海戲,仲要着潛水衣再加幾件衫,浸喺水十幾分鐘都攰。」其中一場戲,青雲要跳落水渠與激流搏鬥,原來他險些被沖走,「我哋喺內地湖泊附近嘅急流拍,係獨木舟比賽場地。雖然水唔算深,但有好多石,急流嚟到我企唔穩,所以要全程吊住威也,如果沖走咗無人會救到我,可能直接沖返香港!」韋家輝戲言要給老友一個機會挑戰自己:「青雲一向都好叻,所以要搵啲難嘅嘢,唔好便宜佢!」

至於戲中最難處理的場面,韋家輝認為是廟街的追逐及跳樓戲。「電影喺疫情前拍,當時同依家比已經係兩個世界,要喺街邊拍大型場面好難,如果我哋呢齣戲要搭景就唔真實,所以好慶幸當時揀咗去廟街拍,好有以前港產片嘅感覺。」今次與老拍檔青雲再合作,韋家輝笑說:「每次青雲都畀到驚喜我,早年拍《鬼馬狂想曲》有場打麻將戲,我都未諗點拍,佢會同我一齊創作,好有互動,當時仲有吳鎮宇,兩個都係好勁嘅演員。」至於經驗豐富的青雲,認為今次精神分裂的角色十分複雜,要經常思考如何演繹,「太太(郭藹明)有時見我好靜,都知道我諗緊戲。(難抽離角色?)從來無諗過呢個問題,任何識演戲嘅人都係一樣,自然會抽身出嚟,反而早年幫韋家輝拍《再生號》先係最甘。」問青雲有否考慮涉足幕後?他笑說:「我身邊啲編劇、導演太勁,自己不如專心做演員啦,做擅長嘅嘢比較好。」

留家抗疫心繫電影

疫情肆虐兩年多,青雲留家避疫及撲口罩,與太太郭藹明日對夜對。「以前我日日出去開工,屋企部吸塵機都唔知放喺邊。(與太太重新認識?)佢又無咁講,但我知多啲屋企嘢,亦多咗關心父母。」抗疫多時,青雲難免曾胡思亂想,「當時諗過,會唔會以後唔拍戲呢?但我衡量過,自己無其他才華,留喺屋企睇戲、睇劇,發覺自己都係屬於呢行。」

場地︰駱克道81號

韋家輝:

髮型︰Peter Cheng

化粧︰Chi Chi Li

撰文︰Steven

攝影︰KAON@rworkshop

美術︰顏玉玲

為韋家輝《神探大戰》搏盡 劉青雲拍激流戲險喪命

青雲在激流中搏鬥的場面花盡力氣,毫不錫身。(網上截圖)

為韋家輝《神探大戰》搏盡 劉青雲拍激流戲險喪命

韋家輝讚青雲每次演出都有驚喜。

為韋家輝《神探大戰》搏盡 劉青雲拍激流戲險喪命

《神探大戰》於疫情前在廟街取景拍攝,呈現港產片獨有味道。

為韋家輝《神探大戰》搏盡 劉青雲拍激流戲險喪命

為迎合韋家輝的即興拍攝手法,蔡卓妍坦言心情經常徬徨不安。