《白色強人II》演手術戲 陳豪貪玩用胃鏡自拍

新劇《白色強人II》今晚首播，除了原班人馬郭晉安（安仔）、馬國明及唐詩詠等演出，亦有陳豪及胡定欣加盟。陳豪在劇中飾演醫術高明兼為人幽默的醫生李文信，他在鏡頭前一臉嚴肅做手術，鏡頭後卻相當佻皮；其中一場微創手術戲，陳豪拿着「新到埗」的胃鏡玩得不亦樂乎，不但開心周圍照，更拿來selfie扮鬼臉，效果搞笑又驚嚇。

至於安仔在今輯劇情中，經常在立法會為罕見病病人爭取「全面開放藥物名冊草案」，故要應付大量對白及艱辛專業名詞。劇組讚安仔記對白能力驚人，令劇組事先準備好的「貓紙」無用武之地。問安仔記對白的心得？他笑言只能「死背爛背」：「因為有好多專業名詞，同平時講嘢唔同，所以一定要背到好熟，如果唔係就會令人覺得好生硬。好似立法會入面嘅對白，我會預早一個月前，喺揸車時不停將對白逐頁咁反覆背熟佢，觀眾睇落就唔會覺得有瑕疵。」