【聲明】港生活網站並無進行電話推廣活動

再戰影圈扮補習天王 王浩信曬金句冧愛女

發佈時間: 2022/07/27

由王浩信及余香凝(Jennifer)主演的青春片《心裏美》將在明日公映,二人分別飾演補習天王及中學教師,從死對頭逐漸變成戀人,這位兩屆視帝為電影付出120分努力。「今次同我喺電視台演喜劇好唔同,加上係小本製作有教育意義,希望感動觀眾。」浩信的演出成功感動愛女王靖喬,令他大感滿足。

《心裏美》由浸會大學電影學院製作,獲電影界猛人陳果、吳雨等任監製,並起用不少大學生演出,為影圈培育新血。該片探討現今教育制度,剖析親情、愛情及師生情,題材正面。王浩信飾演的學界最強補習天王何Sir,誓要助DSE考生摘下5**。戲中,他的金句「Stars Were Fully Booked,星星任我捉」押韻又易記,故事亦貼地,有望令年輕觀眾產生共鳴。

雖然浩信兩奪視帝,但他過往拍電影如《我愛HK開心萬歲》、《撕票風雲》等,戲份不多;今次難得再闖影圈扮演教育界人士,是他從影以來一大挑戰。「睇完劇本覺得好有意思,我第一次扮補習天王,角色自信又識講笑,劇情令觀眾反思教育問題。」他指角色每次授課時如同做騷,令他重拾學生時代補習的回憶,「當年我上過補習名師嘅堂,不過學費貴,就揀平啲學費,隔住電視上堂聽書。」問他可有參考無綫的校園劇?他堅定稱︰「無!始終時代唔同,如果參考舊作就會有前輩影子,我想演一個貼地嘅補習天王。」

余香凝投入演父女戲

女主角余香凝則扮演中學教師Miss Lee,她說︰「以前喺電影《非同凡響》扮學生,今次就以老師角度睇教育,究竟乖同壞嘅學生要點教?點樣做一個稱職嘅老師?終於明白為人師表嘅難處。」提到是否熱血Miss,她笑稱︰「我喺戲中教學無方向,靠王浩信呢個補習天王提點,拍攝時佢都幫我入戲。」現實中,她間中跟中學老師聯絡,拍攝前相約見面,乘機偷師,「我嘅中學老師好有心,即使同我哋學生年齡相距大,都可以打成一片,毫無代溝。」至於戲中Jennifer與吳岱融的父女情亦真摯感人,她透露劇情是現實中不少父女的寫照,「我同自己爸爸都係咁,大家都唔識向對方表達愛意,成日嗌交。」

女兒有共鳴最開心

至於浩信與吳岱融則是首度合作,「戲中我哋亦師亦友,我幫Jennifer修補父女關係,佢哋嘅父女情睇到我眼濕濕。」浩信表示其補習天王角色並非純以金錢掛帥,反而有柔情一面,「我個角色好關心身邊人,希望畀到大家窩心嘅感覺,自己演繹追求細致,加上齣戲又係小本製作,有教育意義,我付出咗120分努力,希望感動觀眾。」原來《心裏美》今年初曾舉辦試映會,浩信女兒王靖喬亦有捧場,更代入學生角色,「個女係咁講我喺戲中啲金句,又叫我表演畀佢睇!」難得角色打動愛女,浩信非常感恩,「身為父親,發現演呢個角色,原來可以娛樂個女!」另外,早前浩信演出的內地真人騷反應不俗,工作亦陸續有來,「近兩年拍咗幾齣電影同內地網大(網絡大電影),嚟緊陸續推出,但我會繼續喺香港拍劇,每次演出都盡全力,希望用作品說話!」

撰文︰Steven

美術︰梁政敏

攝影︰林良明

再戰影圈扮補習天王 王浩信曬金句冧愛女

王浩信最開心女兒欣賞他的補習天王角色。(資料圖片)

再戰影圈扮補習天王 王浩信曬金句冧愛女

Jennifer為演好教師角色,特別向中學老師取經。(網上截圖)

再戰影圈扮補習天王 王浩信曬金句冧愛女

二人在戲中分享教育理念,更漸生情愫。(網上截圖)

再戰影圈扮補習天王 王浩信曬金句冧愛女

王浩信早前與張振朗及高海寧出戰內地真人騷《開播!情景喜劇》。(微博截圖)