《愛回家》CPU｜譚坤倫愛犬走失14小時險撞車 通宵「洗樓」行山 戲劇性尋回小雲

31歲的譚坤倫（Alan）在2011年參加無綫綜藝節目《功夫新星》入行，近幾年憑在《愛·回家之開心速遞》飾演IT三子之一的施彼余（CPU）而為人認識。Alan除了做演員之外，亦有兼任健身教練。而外型健碩的Alan原來是一名狗奴，家中飼養了兩隻貴婦狗，分別是小吉及小雲，狗狗一大一細常被以為是兩母子。Alan最近接受《晴報》訪問，分享10年來飼養小吉及小雲的經歷。

同場加映：趙頌茹曾是大孩子 不懂抗壓逃避 單親媽媽發奮 感恩女兒成精神支柱

{{hket:ul-video id="6298"}}{{/hket:ul-video}}

{{hket:inline-image name="H.jpeg"}}{{/hket:inline-image}}

Alan自小已好鍾意動物，曾養過兔仔、倉鼠及臘腸狗。直至10年前，Alan被外型可愛的貴婦狗吸引，因而決定再養寵物。他憶述當時買小吉的經過：「本身想養啡色嘅貴婦狗，但係當我去到選擇嘅時候，又發覺白色好似隻羊仔，真係好得意，所以最後選擇咗白色，好合眼緣。」之後又買了小雲做小吉的伴。

小吉及小雲都是雄性，但主人Alan表示前者常被錯認是小雲的媽媽，「小吉大隻啲，而小雲就細隻好多，同埋好受歡迎，因為佢行路好似機械狗咁樣，哈哈！」

{{hket:inline-image name="C.jpeg"}}{{/hket:inline-image}}

Alan與兩隻狗狗相處10年，感情深厚。問到與牠們發生的難忘事？Alan表示有數次驚險的經歷，「首先小吉係一隻好細膽嘅狗，一有行雷、閃電、有曱甴、佢就會跳上床坐喺角落頭。試過有次放狗，可能因為我搵佢大叫嘅關係，佢無啦啦上咗上一層嘅圍欄外面，企咗喺度，行前多一步就會跌落嚟，勁驚險！好彩當時有個好心人抱返佢入嚟。」

至於與小雲的難忘事，Alan就指小雲曾走失了14小時，令他十分擔心。「平時放狗小雲都跟得我好貼，但係無啦啦有一次畀人嚇一嚇，一下跑走咗，結果我搵咗一個通宵，由凌晨兩點搵到下晝四點。由於我住得比較近山，所以當時嘗試過上山搵，亦都擔心佢畀人抱走……我仲試過洗樓，喺每一層叫佢個名，睇吓會唔會有狗仔叫，但係一直都搵唔到……之後就擴大範圍，租單車繼續搵，然後又貼晒街招，仲貼到去議員辦事處。最後由議員辦事處嘅職員發現佢，我再聯絡附近嘅街坊幫手睇實佢，因為捉佢係比較難；但係最得意係最後屋企人下晝出街嘅時候，落樓下就見到佢，喺佢差啲想衝出馬路嘅時候叫咗佢返嚟，最後用咗14個小時先成功帶咗佢返屋企。」

而小雲最近有份拍劇集《寵愛Pet Pet》，初嚐上鏡滋味。Alan表示雖然小雲只是做臨時演員，但牠已非常緊張。Alan說：「多數我抱住佢，佢唔會亂咁吠，係惟獨有一次我放佢喺地下嘅狗袋入面，林夏薇太興奮沖埋嚟，伸手想抱佢，佢就突然間跳出來想咬佢……」Alan解釋因為小雲細細隻，想保護自己才會做出此舉動。

{{hket:inline-image name="6.jpeg"}}{{/hket:inline-image}}

Alan除了養兩隻狗仔之外，早前曾與張明偉一同到浪浪狗場幫手照顧狗仔，「張明偉之前喺狗場收養咗隻狗，然後佢間唔中都會去嗰邊幫手放狗，因為嗰邊得一個人去照顧咁多隻狗仔，咁我就順便跟去見識吓。」他形容該狗場不止有流浪狗，還有傷殘嘅狗仔，「不過喺狗場嘅主人幫助下，搵人改裝咗架車仔畀佢，令到佢可以周圍跑。」他指自己得閒就會去狗場幫手照顧狗仔，真係非常有愛心呀！

問到Alan會否領養狗仔，他就表示「兩隻夠晒數」，「因為始終要投放返相應嘅時間同責任，養太多我怕未能照顧到。始終10年啦，有時候都幾擔心啲狗仔會離開，可能睇見身邊太多朋友同貓狗分離，嗰種心情自己好怕經歷……而家都好珍惜同佢哋一齊嘅時候。」

圖片來源：受訪者提供

PetPet星｜容天佑曾被狗場呃錢無阻愛心 助養內向唐狗佩佩：好想保護佢【下一頁】

撰文：林惠珊