為《海賊王》電影配音自肥成功 江𤒹生恨製作本土動畫圓

日本國民動漫《海賊王》最新電影《ONE PIECE FILM RED》將於本月25日在港上映，粵語版邀得男團MIRROR副隊長江𤒹生（AK）及女團COLLAR成員邱彥筒（Marf）聲演父女，甚有新鮮感。AK原來是《海賊王》超級忠粉，今次能參與可說是自肥成功，他希望日後製作自家本土動畫，讓更多人留意動漫文化。

新片《ONE PIECE FILM RED》為《海賊王》連載25周年紀念作，首次聲演動畫的江𤒹生，便能參與從小熱愛的《海賊王》，令他興奮不已。AK笑言當日差點錯過是次黃金機會，皆因當時他正忙於拍攝另一部電影，經理人黃慧君（花姐）擔心他若接下配音工作，體力難以應付，「但我同花姐講就算幾攰都好，我真係好想參與，因為呢套動畫係我由細到大都咁鍾意，非常開心有份配音。」

為角色壓低聲綫

AK在電影中聲演「紅髮」撒古斯，事前他特意參考「紅髮」的日本原聲配音，以調節自己的聲綫，他最擔心自己有懶音：「起初我都擔心未必應付到，好彩配音嗰陣有專業導師幫我調校，同埋『紅髮』呢個角色比較少講嘢，主要用霸氣去震懾其他人，所以配音唔算好困難。我都特別用咗一把沉實少少嘅聲去配，但係有時唔記得咗，會用番自己把聲，所以要導師微調。」結果，AK只花1.5小時便完成配音，問到有潛質做聲優？他謙稱︰「因為我本身真係好鍾意呢部動漫，了解比較深，所以容易啲投入，我相信唔存在天份嘅，哈哈！」

熱愛日本動漫的AK，早前推出歌曲《信之卷》時，特別找來本土動畫師製作動畫MV，他透露已為自家服裝品牌創作Q版角色，希望日後以角色為藍本，「我想創作一個新嘅動漫世界畀香港觀眾，令唔同嘅人留意動漫文化。」

Marf難忘叫AK做爸爸

至於同樣首次為動畫配音的邱彥筒，聲演「超越次元的歌聲」美音。本身是《火影忍者》粉絲的Marf，坦言並非《海賊王》迷，不過她接到工作後，即向身邊的「海賊迷」取經，「我個角色係電影原創，所以參考資料唔多，我配音前只睇過預告片同對白內容，覺得自己同角色都有啲相似，都係有正義感，同埋想令世界開心。」提到她跟AK演父女，她以「AK爸爸」稱呼對方︰「可惜今次無機會一齊錄音，我聽住佢把聲去聲演，係難得嘅間接合作。」Marf回想去年參加《全民造星IV》時，AK曾出任她的導師，希望將來彼此能正式合作。

採訪、攝影：Pauline

美術：梁政敏