【聲明】港生活網站並無進行電話推廣活動

最想挑戰的技能 何廣沛︰補鐘學揸棍波車

發佈時間: 2022/08/16

不少藝人為了拍戲,特地學習一身技能,但總有難以克服的失敗時候。自覺駕駛技術了得的何廣沛學揸棍波古董車,誰知換來教車師傅一句「揸番自動波」;自幼習舞的朱智賢竟然未能成功做一字馬,他們表示下定決心要挑戰成功。

何廣沛本身已有自動波車牌,直至多年前拍攝無綫劇《財神駕到》時,因需要駕駛一輛60年代的棍波古董車,所以隨教車師傅上堂學習。他表示︰「上咗一堂之後,師傅就同我講『你都係揸番自動波啦』,原來我無呢方面嘅天份,我以為自己嘅駕駛技術都幾叻,加上本身已經有自動波concept(概念),唔係一張白紙,真係無諗過原來揸棍波咁難。」

何廣沛又憶述拍攝《財》劇時的點滴︰「當時工作人員要先控制好部車,我再坐上去,不過之後只可以行直綫,如果要我轉彎或轉波就搞唔掂。」何廣沛笑言其棍波駕駛技術只能應付拍攝需要,無信心在路面駕駛,因此他希望有時間多學幾堂,克服這個難題。

朱智賢︰練成一字馬

港姐出身的朱智賢(朱朱),雖然自小習舞,但因天生筋骨硬,一直未能做到一字馬。她說︰「細個嗰陣,見好多女仔都做到好多唔同動作,但自己點都拉唔到,所以好唔開心;大個咗後先知道要捱住痛拉筋,就做到呢啲動作。早排練得勤力,筋骨好似柔軟咗,但依家少練習就打回原形。」

朱朱又直言對一字馬有陰影︰「我試過差啲壓到落地,但個人就開始心急,唔小心拉傷咗,最後休息咗幾個月…到依家仲有陰影,擔心去得太盡會再整傷。」不過,她為自己訂下目標,希望今年內能成功做到一字馬,她表示︰「我會努力衝破心理障礙,先天不足,後天努力嘛!」

賴慰玲︰趁後生玩滑翔傘

賴慰玲笑言最大的挑戰,是想趁後生一嘗玩滑翔傘的滋味。她說︰「從來未玩過(滑翔傘),真係好大挑戰,雖然我無畏高,仲試過連續玩十次跳樓機,但依家已經唔得。不過滑翔傘、笨豬跳,一生人點都要玩一次,因為我好鍾意飛上天嘅感覺。」十足大細路的她,還想跟兒子一起玩飛索,原來她曾讓四歲多的囝囝獨個兒玩飛索,囝囝竟然完全不怕,玩得十分開心,似乎遺傳了她的貪玩基因!

賴慰玲解釋為何堅持要玩一次滑翔傘:「就係因為依家仲未知驚,但隨住年紀愈大,就開始愈細膽,之前張振朗拍節目玩過滑翔傘,我叫佢帶埋我去玩呀!所以希望快啲可以去外地,盡情玩呢類活動。」

採訪︰Pauline

美術︰顏玉玲

最想挑戰的技能 何廣沛︰補鐘學揸棍波車

何廣沛本月初34歲生日,與新劇《你好,我的大夫》拍檔齊齊慶祝。(IG圖片)

最想挑戰的技能 何廣沛︰補鐘學揸棍波車

何廣沛在《財神駕到》中與黎耀祥演對手戲。(網上截圖)

最想挑戰的技能 何廣沛︰補鐘學揸棍波車

朱朱試過做一字馬時受傷,自始留下陰影。

最想挑戰的技能 何廣沛︰補鐘學揸棍波車

朱朱穿上運動背心行山,大曬小蠻腰。(IG圖片)

最想挑戰的技能 何廣沛︰補鐘學揸棍波車

賴慰玲笑言刺激活動要趁早嘗試。

最想挑戰的技能 何廣沛︰補鐘學揸棍波車

四歲兒子遺傳賴慰玲的貪玩基因。(IG圖片)