明日戰記丨古天樂忍10級痛赴美做頸椎手術 劉青雲調侃：唔怪之得成日黑口黑面

古天樂（古仔）嘔心瀝血監製及主演的科幻電影《明日戰記》昨日上映，上畫首天票房截至下午5時，票房錄得$2,593,704，成為2022年華語片開畫票房No.1，認真厲害。古仔與戲中拍檔劉青雲日前結伴受訪，青雲自爆開拍初期右腳即告受傷，古仔更因長期穿着重30多磅的裝甲，以致兩節頸椎重創，難抵十級痛的他不但要吃嗎啡藥止痛，更遠赴美國動手術，為了這部電影犧牲不少。

同場加映：痞子殿下丨陳瀅彈JW最大缺點係忍唔到笑 難忘拍劇捱眼瞓 攬埋一齊喊

{{hket:ul-video id="6388"}}{{/hket:ul-video}}

{{hket:inline-image name="6D8A0078_mr1661166205833.jpg"}}{{/hket:inline-image}}

古天樂和劉青雲在《明日戰記》中肩負保護地球的責任，每次出動都要穿上重30多磅的裝甲打鬥。青雲坦言十分辛苦：「真係好重，去廁所又麻煩，去完着番套裝甲都要幾分鐘，仲要幾個人幫我。」古仔透露最初花半小時穿整套裝甲，後來慢慢熟習至15分鐘便完成；拍攝時天氣酷熱，他們每天揹着重重裝備開工，古仔直言當時瘦了近十磅，不過青雲笑言︰「係好吃力，熱到可以倒水出嚟，但我好快補番，又唔係瘦好多。」

{{hket:inline-image name="6D8A0012_mr1661163741588.jpg"}}{{/hket:inline-image}}

拍攝連串動作場面難免受傷，青雲自爆開拍初期不慎弄傷右腳。「我吊住威也落地嗰陣太快，『銀』到腳板，但要繼續拍，所以九個月後先好番。」古仔的傷勢則嚴重得多，「拍嘅時候無受傷，但兩年後條頸有事，去咗美國做手術，兩節頸骨換成鈦金屬。醫生話類似呢啲情況，係運動員先有，因為佢哋成日撞，而我受傷最大可能就係着住裝甲。」他坦言痛到難以忍受，「醫生問我痛到咩程度，由一至十級最痛，我話係十級，仲要係長期痛，痛嗰時要食嗎啡藥止痛，瞓覺都轉唔到身。」

{{hket:inline-image name="6D8A0143_mh1661167756328.jpg"}}{{/hket:inline-image}}

古仔更分享一件在手術室發生的趣事，「麻醉師喺手術前叫我簽份嘢，到我差唔多瞓着時，佢突然話仲有一份要我簽，但我已經暈暈地，仲以為叫我簽生死狀。原來份文件係話如果發現有多節頸骨受傷，就要我授權先可以做埋。做完手術就完全唔痛，已經好番晒。」身旁的青雲聞言笑說︰「唔怪之得喺片場成日黑口黑面，依家條頸咪好硬？難怪你鍾意拍機械人片，又唔使瞓覺。」青雲表示拍《明》片有不少新穎體驗，包括在綠布前對空氣演戲、駕駛戰車等，古仔則說︰「我都體驗咗直升機俯衝落嚟嘅感覺，架直升機擺咗喺雲台上，真係『chok』到你暈。」青雲笑言︰「講明『暈』台吖嘛！」

{{hket:inline-image name="101.jpg"}}{{/hket:inline-image}}

眾所周知古仔熱愛科幻電影，問他會否開拍續集？他指︰「睇埋呢部先。呢套籌備咗好耐，尤其係前期特技。」導演吳炫輝笑古仔在片場會精神分裂？古仔笑言︰「我哋買晒啲綠布無得再買，要自己染布；個大廈景又被風吹冧，要由頭搭過，點會唔精神分裂？簡直精神崩潰！但中途都無諗過放棄。」他揚言下一部電影會放入最愛的外星人題材，「依家搞緊，仲難拍過呢部十倍，都係用番本地製作班底，會全部用LED拍太空大戰。」

{{hket:inline-image name="040617_172.jpg"}}{{/hket:inline-image}}

撰文：倪小珊

場地︰香港麗思卡爾頓酒店

古天樂
髮型︰Dan Tam @O4
化粧︰Carmen Man