【聲明】港生活網站並無進行電話推廣活動

開騷多波折感觸落淚 林家謙曾想取消演出

發佈時間: 2022/08/30

一連七場的林家謙《SUMMER BLUES演唱會》前晚圓滿結束,尾場家謙談開騷感受時,坦言曾擔心不夠歌想取消演出。家謙指開騷以來波折多,又稱自己做得未夠好,感謝圈中好友們一直鼓勵以及大家支持!

林家謙演唱會尾場請來特意由加拿大返港的鄧小巧,由於受疫情措施影響,鄧小巧滯留機場48小時才順利抵港,隔離三日後以「黃碼」人士身份上台。家謙感激小巧這次排除萬難做嘉賓︰「有你出現先完美,最好嘅旋律都畀咗你。」小巧感動落淚!做足七晚嘉賓的Serrini指家謙為演唱會努力健身,「佢吹噓自己有26吋腰同六嚿腹肌!」然後她與嘉賓Tyson Yoshi「夾攻」為家謙脫衣,Tyson更「公主抱」家謙。尾場驚喜不斷,還有陳蕾和RubberBand擔任嘉賓。

感謝林夕鼓勵

家謙安歌時在台上講感受,坦言壓力超大:「做呢個騷,除咗好多外在環境因素,每日都要拆彈,但最大關口係自己。大家鍾意我其實係僥倖,自己唱歌唔係特別得,要應付呢個騷,我真係唔夠歌,之前一直無諗過會開騷!」他坦言沮喪到想放棄:「開騷前兩個禮拜想取消個騷!」家謙指多得林夕鼓勵他,又感謝黃偉文為他填詞。

完騷後家謙接受訪問,對於成為MIRROR意外發生後首個紅館騷,家謙坦言有壓力︰「其實壓力都係來自擔心觀眾嘅心理狀況,可能有啲人會帶住複雜嘅心情入場,好彩大家都睇得安心。」

一按睇片

採訪︰Pauline

攝影︰林良明

開騷多波折感觸落淚 林家謙曾想取消演出

林家謙尾場講感言時感觸落淚。

開騷多波折感觸落淚 林家謙曾想取消演出

Serrini和Tyson Yoshi夾攻要脫去林家謙的外套,Tyson更「公主抱」家謙。

開騷多波折感觸落淚 林家謙曾想取消演出

鄧小巧由加拿大千辛萬苦返港做嘉賓!

開騷多波折感觸落淚 林家謙曾想取消演出

林家謙完騷訪問指開騷前壓力大,一度想取消演出﹗