郭晉安（安仔）主演的劇集《白色強人II》收視口碑俱佳，安仔演活患腦腫瘤仍然排除萬難爭取病人權益的明成北醫院院長楊逸滔（YT），盡顯三屆視帝功力，更被指有望今年衝擊第四次視帝寶座！近年安仔與不少新晉演員合作，他對周嘉洛讚不絕口，更因而憶起自己當新人時的刻苦年代！
同場加映：林家謙自嘲「手語式」跳舞 意外後開騷有壓力 機關人性化
近年安仔留港密密拍劇，今年初有《飛虎3壯志英雄》推出，其後《回歸》、《白色強人II》亦先後播映，觀眾一晚見足兩次安仔，兩劇反應甚佳，有望助他年尾再爭視帝。早前安仔受訪時，坦言過去十年也未試過同時推出兩部劇，而他最難忘年初拍攝劇集《回歸》時，遇上疫情大爆發，「當時TVB所有錄影廠都停晒，足足一個月，所以拍呢齣劇算係休息時間最充裕，唔算太辛苦。」
提到電視圈新一代，安仔大讚《回歸》中飾演其子的周嘉洛及吳偉豪。「佢哋都係20幾歲嘅後生仔，體能好好又捱得，不過我入行時佢哋都未出世，嘉洛都話細細個睇我嘅《戇夫成龍》。」安仔對後輩們讚不絕口，他指嘉洛與偉豪為《回歸》開工同時仍要拍《愛．回家之開心速遞》，見證二人捱得辛苦。安仔坦言憶起自己「小鮮肉」時代為拍劇時同樣搏盡，「我做新人時期好興拍古裝武俠劇，當年要親身拍打戲又要吊威也，捱得好甘！」
與此同時，近年不少資歷較淺的男演員如王浩信、譚俊彥等成為《萬千星輝頒獎典禮》最佳男主角，賽果被外界質疑。演技早獲肯定的安仔為後輩說盡好話，「佢哋都係實至名歸，我覺得演員唔好太在意外界評價，每件事無得做到完美。依家競爭好大，好似周嘉洛、吳偉豪都上緊嚟，可能遲啲潮流又變。」他回想自己剛入電視圈時，很多演員在十多歲已開始走紅，「好似80年代嘅五虎，梁朝偉都係17歲做男主角，我21歲先做男一已經叫遲，所以未來潮流我哋都唔知！」
另一方面，當安仔談及一對子女時一臉滿足，他指14歲大仔郭令山音樂天份高，「佢受音樂老師感染，鍾意古典音樂，對管弦樂有濃厚興趣，玩樂器已經考到演奏級，將來升大學都想揀歐洲嘅音樂學院。」至於十歲細女郭以雅，他指女兒好有表演慾，「佢好細個時就鍾意韓國女團，好迷BLACKPINK，好鍾意跳jazz。」安仔大讚以雅遺傳其演藝細胞，至於是否希望女兒繼承父親衣缽殺入娛圈，他卻未敢多想，「細女依家仲係好黐家，長大咗會有唔同諗法，等佢讀完書畢業後先諗。」可見他未心急做星爸。
撰文︰梁紹明
攝影︰Bob（部分）