【聲明】港生活網站並無進行電話推廣活動

回憶新人年代捱得甘 郭晉安點名睇好周嘉洛

發佈時間: 2022/09/01

郭晉安(安仔)主演劇集《白色強人II》收視口碑俱佳,安仔演活患腦瘤仍排除萬難爭取病人權益的明成北醫院院長楊逸滔(YT),盡顯三屆視帝功力,更有望今年衝擊第四次視帝寶座!近年安仔與不少新人合作,對周嘉洛讚不絕口,更因而憶起自己當新人時的刻苦年代。

近年安仔留港密密拍劇,今年初有《飛虎3壯志英雄》推出,其後《回歸》、《白色強人II》亦先後播映,觀眾一晚見足兩次安仔,兩齣劇反應甚佳,有望助他年尾再爭視帝。早前安仔受訪時,坦言過去十年也未試過同時有兩齣劇推出,最難忘年初拍攝《回歸》期間遇上疫情大爆發,「當時TVB所有錄影廠都停晒,足足一個月,所以拍呢齣劇算係休息時間最充裕,唔算太辛苦。」

安仔大讚《回歸》中飾演其子的周嘉洛、吳偉豪等電視圈新血,「佢哋都係20幾歲嘅後生仔,體能好好又捱得,不過我入行時佢哋都未出世,嘉洛都話細細個睇我嘅《戇夫成龍》。」安仔對後輩們讚不絕口,他指嘉洛與偉豪為《回歸》開工同時仍要拍《愛‧回家之開心速遞》,見證二人捱得辛苦。安仔坦言憶起自己「小鮮肉」時為拍劇時同樣搏盡,「我做新人時期好興拍古裝武俠劇,當時要親身拍打戲又要吊威也,都捱得好甘!」

撑後輩有實力上位有理

另外,近年不少資歷較淺的男演員如王浩信、譚俊彥等成為《萬千星輝頒獎典禮》最佳男主角,但賽果被外界質疑。演技早獲肯定的安仔為後輩說盡好話,「佢哋都係實至名歸,我覺得演員唔好太在意外界評價,每件事無得做到完美。依家競爭好大,好似周嘉洛、吳偉豪都上緊嚟,可能遲啲潮流又會變。」他回想自己剛入電視圈時,很多演員在十多歲時已開始走紅,「好似80年代嘅五虎,梁朝偉都係17歲就做男主角,我21歲先做男一已經叫遲,所以未來潮流我哋都唔知!」

子有音樂天份女有表演慾

另一方面,當安仔談及一對子女時,一臉滿足,他指14歲大仔郭令山音樂天份高,「佢受音樂老師感染,鍾意古典音樂,對管弦樂有濃厚興趣,玩樂器已經考到演奏級,將來升讀大學,都想揀歐洲嘅音樂學院。」至於十歲細女郭以雅,他笑指女兒甚有表演慾,「佢好細個時已經鍾意韓國女團,佢好迷BLACKPINK,好鍾意跳jazz。」安仔大讚以雅遺傳其演藝細胞,問到可希望女兒繼承父親衣缽殺入娛圈?他卻未敢多想,「細女依家仲係好黐家,長大咗會有自己諗法,等佢讀完書畢業後先諗!」似乎仍未心急做星爸。

撰文︰Steven

攝影︰Bob

美術︰梁政敏

回憶新人年代捱得甘 郭晉安點名睇好周嘉洛

安仔在周嘉洛身上看到自己的影子,睇好這位新星上位。(IG圖片)

回憶新人年代捱得甘 郭晉安點名睇好周嘉洛

安仔和歐倩怡婚後育有一對仔女,分別為14歲大仔令山和十歲細女以雅。(IG圖片)

回憶新人年代捱得甘 郭晉安點名睇好周嘉洛

安仔認為時代不同,觀眾喜歡演員的類型也大有分別。

回憶新人年代捱得甘 郭晉安點名睇好周嘉洛

張曦雯與安仔在《白色強人II》飾演一對,觀眾甚為受落。(IG圖片)

回憶新人年代捱得甘 郭晉安點名睇好周嘉洛

安仔(左二)與羅嘉良(右一)、李婉華(右二)等小生花旦是90年代TVB的收視保證。(IG圖片)