梅小青牽綫佘詩曼代言保健產品

現年47歲的佘詩曼（阿佘）保養得宜，多年來保持蛇腰，皮膚白滑有光澤，最近更成為保健產品代言人。她大方分享心得︰「我多年嚟都係少食多餐，呢兩、三年疫情關係，比之前更加注重健康，每日做30分鐘瑜伽。而平日飲食吸收唔到嘅，就要靠保健產品，所以我會多方面配合，狀態先可以keep到。」阿佘在無綫經典劇集《宮心計》飾演「三好」，角色深入民心，原來今次廣告正是由《宮》劇監製梅小青牽綫。拍攝當日，阿佘狀態十足，跟前來探班的小青姐開心暢聚，阿佘說︰「因為品牌老闆係小青姐好朋友，所以就促成今次合作！」

今次廣告是由梅小惠團隊負責，阿佘表示：「我哋係識咗好耐嘅朋友，但第一次用呢個形式合作。」小惠則大讚阿佘專業：「阿佘大部分嘅shot（鏡頭）都係一take過順利完成，表情對白都掌握得好精準，佢仲會畀唔同嘅角度我哋拍攝，難怪佢演繹唔同角色都咁成功。」