【聲明】港生活網站並無進行電話推廣活動

處女執導困難想放棄 李佳芯千辛萬苦請張同祖演出

發佈時間: 2022/09/19

李佳芯(Ali)為慈善機構「耆智園」拍攝關注腦退化症短片《伴》,集導演、編劇、監製及演員於一身。短片昨日於網上首播,Ali為慈善碌盡人情卡,並用誠意打動資深導演兼演員張同祖出山,在片中飾演父女。首次參與幕後的Ali坦言過程比想像中艱辛,一度想放棄。

李佳芯今次可謂由零開始,由於從無製作經驗,要四出「拍膊頭」找幕後朋友幫忙。過程困難重重,Ali因為壓力太大而萌生放棄念頭,她表示︰「我初時諗得太簡單,到真正去搵人幫手時先發現比想像中難,當時真係好徬徨無助。老實講我一蚊都無收,既然唔係為賺錢,點解我要攞苦嚟辛呢?」幸好最後得到幕後朋友們協助解決難題,才令她順利完成。

張同祖不知Ali是誰

Ali透露邀請到多年未有亮相幕前的張同祖出山,與她演兩父女,過程過五關斬六將。Ali先托朋友聯絡張同祖,但對方卻不知道李佳芯是誰,更沒看過她的作品,Ali說︰「我膽粗粗約佢出嚟飲茶以表誠意,第一次見面祖哥畀咗好多劇本上嘅寶貴意見。經過幾次見面後,終於打動到佢出山演出。」Ali感激祖哥不但無計較酬勞,更在拍攝時無私分享執導經驗︰「我喺佢身上睇到佢對電影嘅執着同熱誠,十分敬佩。」令她獲益良多。

最終Ali籌備歷時一年的心血,昨日在其個人YouTube頻道播出,同時宣布推出個人YouTube頻道,可算是「雙喜臨門」。她透露本來打算舉行首映禮,廣邀長者及傳媒好友,奈何疫情反覆令計劃泡湯,她表示︰「我諗深一層,搞首映最多都係幾百人入場睇,但呢個project受眾更多先有意義,所以最後以網上形式播出,大家都可以免費睇到,影響力先會更加大!」

撰文:Doris

美術:梁政敏

處女執導困難想放棄 李佳芯千辛萬苦請張同祖演出

Ali感激張同祖無私分享,令她認識真正的電影世界。

處女執導困難想放棄 李佳芯千辛萬苦請張同祖演出

Ali拍攝短片《伴》,首次擔當幕後崗位。