上周確診發高燒咳出血 李司棋興奮剪手帶變回「一綫」藝人

現年71歲的李司棋前日於IG上載在家戴上口罩，自行剪斷居家隔離的電子手環片段，並寫道︰「重返『一綫』藝人行列，上星期發病，頭兩日比較辛苦，之後都ok，到第六、七天就變番一綫了。」圈中好友紛紛留言叮囑司棋姐保重。司棋姐接受《晴報》電話訪問時仍然聲沙沙，她笑言是為食之過，「以為身體已經無乜嘢，食咗幾粒餅仔，把聲就沙咗；啲人話中咗招會無胃口就會瘦，但我就無，我唔食嘢會全身發冷，體力唔夠就好難打呢場仗，我有食粥同麵。」

她透露已打了三針，本月11日外出工作後，回家開始發病，做了快測呈陰性，還以為只是感冒，「點知瞓到半夜，我咳到癲咗，咳到出血，發燒發到39度，再做快測變陽性。當時個人好亂，報衞生署居家隔離，頭兩日真係最辛苦，之後都無乜大礙。」