伍詠薇為16歲愛貓打針餵藥受傷 錫晒一對寶貝：我命都畀埋你

伍詠薇每次喺鏡頭前出現都表現得豪情奔放，私下嘅佢都係咁感情豐富，而且仲好有愛心。伍姑娘與練海棠結婚23年未有生兒育女，但就有兩隻養咗多年嘅愛貓Big Fu及See Fu，伍詠薇坦言視佢哋為子女般看待，更表示為咗佢哋都唔會會去歐洲旅行。日前伍詠薇就展示佢為咗餵See Fu食藥所造成嘅傷勢，充分表現出佢愛貓嘅心以及一個負責任主人應有嘅態度。

同場加映：Summer Girls丨張明偉陳思圻靠自己無悔離巢無綫 節目撼港姐：良性競爭先有火花

{{hket:ul-video id="6643"}}{{/hket:ul-video}}

伍姑娘兩隻心肝寶貝今年嘅較早時間已經過咗16大壽，貓界嚟講都已經到達人瑞級別，不過兩貓都依然好精靈，伍姑娘都表示覺得好安慰。伍姑娘隆重其事分別為兩個寶貝慶生，又答應守護同愛惜兩姐弟終老，非常有愛。

{{hket:inline-image name="272476865_614503426553390_5626229707119911246_n.jpg"}}{{/hket:inline-image}}

不過年紀大都伴隨唔少老人病，伍姑娘都定時要餵佢哋食藥。日前伍姑娘就因為餵阿仔食藥受傷，不過都冇半句怨言，佢留言：「我家兒子金叵羅～思虎仔。媽咪每朝都親手餵你食血壓丸，你天生「蛇𠺌」緊張，每朝都畀你尖銳嘅牙仔「銳」幾嘢喺手指。正所謂十指痛歸心，但係只要你健康，我成隻手畀你咬爛晒都係值得嘅⋯⋯今次自己包紮個傷口雖然肉酸啲，但係因為已經腫咗同埋好多牙齒印傷口。無論點都好，你健康快樂，媽咪就安樂⋯⋯」

除咗食藥，伍姑娘仲花唔少錢為一對仔女買保健品，為咗囝囝行得走得健健康康，對針筒恐懼嘅佢鼓起勇氣同醫生學習打關節針針，真係少啲心力同財力都搞唔掂呀！

伍詠薇唔止對自己「仔女」好，對其他貓貓同樣有愛。佢曾經透露自己由三歲開始已經照顧流浪貓：「因為我係屋邨大，會煮啲魚撈飯拎去餵佢哋。」當時經佢手照顧嘅浪浪已經有60隻：「一手一腳幫佢哋沖涼等等，我係佢哋嘅工人、貓奴才，我成日同佢哋講：『你哋非常幸福。』」

伍詠薇表示自己從來都唔會用錢買貓：「唔會用錢買生命，會收養人哋啲貓bb，或者流浪貓，如果我有能力同條件會再養多啲， 條件係時間，但都係4隻以內。」佢又指曾喺某地方拍劇遇到有人煮貓：「見到啲貓瘦弱如柴，所以我買咗佢返宿舍，我見佢已經冇乜眼神，所以我好想幫佢沖涼，等佢乾淨同舒服啲走，我見到佢隻腳係潰爛，之後兩日倒就喺我大髀走咗，所以希望大家唔好虐待貓狗，珍惜生命，我自己救得同保護得幾多就幾多。」

圖片來源：Instagram